Сәлем саған, туған ел!
Бейсенбі күні Р.Бағланова атындағы мәдениет орталығының ұйымдастыруымен композитор, ҚР еңбек сіңірген қайраткері, «Парасат», «Құрмет» ордендерінің иегері Кеңес Дүйсекеевтің 75 жылдығына арналған «Сәлем саған, туған ел» атты сазгерлер байқауы өтті.Кент, қала және ауылдық жерден 8 адам қатысқан байқауда сазгерлердің талантынан туған туындылары таныстырылып, орындалды. Жоғары дәрежеде өткен байқауға ҚР композиторлар Одағының мүшесі, ҚР мәдениет қайраткері Сәукен Әліш, «Ерен еңбегі үшін» медалінің иегері, ҚР мәдениет саласының үздігі Кемеңгер Өтеп пен ҚР мәдениет саласының үздігі, қобызшы Арман Әуезов сынды өнер майталмандары қатысушы сазгерлерге қазылық етті.
Сайыс нәтижесінде бас жүлде «Қорқыт ата» атындағы балалар музыка мектебінің баян класының оқытушысы Серік Отаралиевке бұйырса, бірінші орынды Серік Төлеу қанжығасына байлады. Жүлделі екінші, үшінші орындарды ақсуаттық Нұртуған Жаңабай, мәдениет саласының ардагері Абылхайыр Ибраймов пен аудандық білім бөлімінің қызметкері Әбілқасым Раман өзара бөлісті.
Серік АҚМЫРЗА
