– Өткен жыл – біз үшін де, әлем елдеріне де оңай жыл болған жоқ. «COVID-19» инфекциясынан сақтану үшін көптеген қауіпсіздік шара қолға алынды. Адамдардың көптеп жиналуына тыйым салынды. Карантиндік талаптарды сақтау үшін биыл есеп беру кездесулерім «Online» өтетін болды. Жаңа технологияның көмегімен өтетін шарада мәселелердің бірі айтылып, бірі айтылмай қалуы мүмкін. Сондықтан да бүгін өздеріңізбен жүзбе-жүз кездесіп, пікірлесуді жөн санадым. Ауылдағы көптеген мәселені білеміз. Кейбіріне жобаларын дайындап, қаржыландыруға ұсынып қойдық, – деген Мұрат Нәлқожаұлы осы жылы «Қарлаң» көпірінің жобасын дайындауға қажетті қаражаттың бөлінгендігін тілге тиек етті.

Жанкентте өткен кездесуде тұрғындар ауылдағы дәрігерлік амбулаторияның іші салқын екенін және медициналық мекемеге жаңа жедел жәрдем көлігі қажеттігін айтты. Сондай-ақ халықтың қолындағы азын-аулақ малын суару жағы қиындап кеткенін, бұл мәселені шешу үшін скважина қазу қажеттігін, спорт зал салу және ауылға көгілдір отын тарту жөнінде мәселе көтерді.

Сырдария өзеніндегі су көлемінің азаюына байланысты төрт түлікке қажетті судың тапшылығы Бірлік ауылында да сезіліп тұр. Бұл туралы ойларын аудан басшысына ауыл халқы бүкпесіз ашық жеткізді. Мұнан бөлек тұрғындар ауыл ортасындағы Жанқожа батыр көшесіне жол кедергісін салу, ауылдық клубтың ішін жылыту және интернет сапасын арттыру жөнінде ұсыныстарын айтты.

Қожабақы ауылдық мәдениет үйінде өткен кездесуде тұрғындар спорт зал салу, «Агро-Өркен» шаруа қожалығының пайдаланылмай тұрған бос жерлерін мемлекет теңгеріміне өткізіп, құжаттарын рәсімдеп, кәсіпкерлік мақсатқа және жайылымдық жерге беру, Бірлік-Қожабақы ауылдары арасындағы «Қаракөл» көлшігін жайылымдық жерге беру жөнінде ұсыныс тастады.

Ауыл малдарын суару қиындап тұрғанын Бозкөл ауылының халқы да алға тартты. Сондықтан ауылдағы 5 скважина көздерін тазалау мәселесін маңызды екенін жеткізді. Бозкөлдіктер ауыл көшелерін жарықтандырып, Қ.Өтепбергенов көшесіне тал егу үшін қоршау және дәрігерлік пункт қажеттігін, ауылға кіреберіс жолдың бойындағы көне гаражды бұзып, орнына көшет отырғызу мен жұмыссыздық мәселесін қоғамдастық арқылы шешуді көтерді.

Бұл күнгі кездесу түстен кейін Тасарық ауылында жалғасты. Аудан орталығынан шалғай жатқан елдімекен тұрғындарын жол мәселесі алаңдатады. Сондықтан болар олар аудан басшысына бірінші кезекте «Отгон» көпірінен Тасарық ауылына дейінгі жолды дұрыстап, көшелерді жөндеу қажеттігін мәлімдеді. Ауылға жедел жәрдем көлігі мен «басы ауырып, балтыры сыздаған» жандарға көмек көрсететін медициналық маманның жоқтығын айтып, «Ердес» бөгетіне шлюз қою, «Қоса» дамбысын жөндеу жөнінде ұсыныс тастады.

Бұл жиында округке қарасты Лақалы ауылының да мәселелері айтылды. Мәселен, ауылдағы клубтың салқындығына байланысты жөндеу және Лақалыдан Жанкент ауылына баратын жолды дұрыстауға қаражат бөлуді сұрады.