Төтенше жағдайға дайындық жүргізілді

Оқу жағдайы барысында 2020 жылдың 25 ақпан күні сағат 15:00 Абай ауылының тұрғынынан №9 Өрт сөндіру бөлімінің байланыс бекетінің «112» телефон нөмеріне Қазалы ауданы, Абай ауылының тұсында Сырдария өзенінің оң жағалауындағы қорғаныс бөгетінің бұзылғандығы туралы ақпарат түсті. Анықталғаны – Абай ауылынан төмен қарай 3 шақырым жерде орналасқан Абай елді мекенінің тұсында Сырдария өзенінен сең жүру кезінде мұзды кептеліс орын алып, салдарынан Сырдария өзенінің оң жақ қорғаныс бөгетінің 10 метр бөгеті бұзылып, аталған елді мекенде су басу қаупі туындады. Осы орайда жедел іске көшкен №9 өрт сөндіру бөлімі байланыс бекетінің радиотелефонисті қызметтерді құлақтандырып, оқиға орнына жіберді. Лезде авариялық-құтқару қызметтері аталған тұсқа жиналды. Қоғамдық тәртіпті сақтау тобы күштерімен қоршалып, күзетке алынды. Төтенше жағдай аймағында жол қозғалысы қауіпсіздігін қамтамасыз етіліп, тұрғындар эвакациялау кезінде автобустарға мінгізілді.

Құрылыс бөлімі Абай елді мекеніндегі қорғаныс бөгеттерін нығайту жұмыстарын жүргізді. Тұрғындар мен материалдық құндылықтарды эвакуациялау жұмыстары жүріп, жергілікті атқарушы органдар Абай ауылындағы №90 мектеп ғимаратында эвакуациялық жинақтау және Қазалы қаласындағы №95 орта мектеп ғимаратында эвакуациялық қабылдау пункті дайындыққа келтірілді.

Абай ауылының тұрғындары эвакуациялық жинақтау және қабылдау пункттеріне арнайы көлікпен тасмалданды. Жануарлар мен өсімдіктерді қорғау қызметі Абай ауылындағы үй жануарлары мен малдардың есебін жүргізіп, қосымша жем-шөп қорын нақтылады. Сауда қызметі эвакуацияланған тұрығындарды азық-түлікпен қамтамасыз етті.

Аудандық төтенше жағдайлар бөлімі төтенше жағдайларды жоюға жұмылдырылған азаматтық қорғау қызметтерінің күштері мен құралдарынының ақпаратын дағдарыс жағдайында басқару басқармасының жедел кезекшісіне баяндап штаб жұмысын жүргізді.

«Көктем – 2020» республикалық командалық-штабтық арнайы-тактикалық оқу-жаттығуына аудан әкімінің орынбасары, штаб басшысы Ғалымжан Еркебай қатысты.