Қазалыда 13-21 тамыз күндері «Ақмешіт – адалдық алаңы» жобалық кеңсесі аясында тұрғындар арасында тұрмыстық сыбайлас жемқорлықтың алдын алу бойынша түрлі форматқа сай шаралар өтті. Онда әр бағытта байқаулар мен сайыстар, дөңгелек үстелдер және акциялар, сондай-ақ флеш-мобтар мен сұхбат алаңдары ұйымдастырылды.

Мәдени басқосулар Қазалы қаласы, Әйтеке би кенті және барлық ауылдық округтерде ұйымшылдықпен өткізілді.

Алқалы жиында кез келген өркениетті қоғам үшін сыбайлас жемқорлықпен күрес ең өзекті мәселенің бірі болып табылатыны түсіндірілді. Жең ұшынан жалғасқан індет заман ағысынан қалыспай, бүгінгі күнге дейін жойылмай отыр. Сананы улайтын кесел дамушы елдердегідей біздің мемлекетімізге де зор нұқсан келтіруде. Сондықтан бұл қасіретпен бүкіл қоғам болып күресу қажеттілігі айтылды.

Айта кетейік, «Ақмешіт – адалдық алаңы» жобалық кеңсесі Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің бастамасы негізінде Қызылорда облысы әкімдігінің қолдауымен ашылды.