Жақында ғана Қарағанды қаласында өткен халықаралық турнирде олжалы оралған қазалылық Ақерке Бақытжан мен Дәметкен Келімбет тағы да бір турнирде жүлделі орындарды жеңіп алды. Атап айтар болсақ, бокстан Сербия мемлекетінің Сомбор қаласында өткен VII "Ұлттық Кубогі" халықаралық турнирде 75 келі салмақта өнер көрсеткен Ақерке Бақытжан күміс, 57 келі салмақ дәрежесінде Дәметкен Келімбет қола жүлдеге қол жеткізді. Осылайша өткен жылды табысты қорытындылаған жерлестеріміз 2018 жылды да жақсы жетістіктермен бастады.

Сербиядағы халықаралық турнирге қатысқан Қазақ елінің спортшылары жалпыкомандалық есепте бірінші орын алып, 6 алтын медаль еншіледі. Одан бөлек, былғары қолғап шеберлері қоржынымызға 6 күміс, 9 қола медаль салып, туған жерге табысты оралды.