Биікті бағындырғандар
Жақында Талдықорған қаласында грек-рим күресінен 2001-2003 жылы туылған жасөспірімдер арасында Қазақстан чемпионаты өтті.Бұл додада ауданымыздың №17 олимпиадалық резервтегі мамандандырылған балалар жасөспірімдер спорт мектебінің спортшылары да бақ сынасты. Мұхтар Рахметов пен Самат Оспан жаттықтырған балуандарымыз жеңіс тұғырынан көріне білді. Жарыс нәтижесі бойынша Диас Қалабай мен Наурыз Абубуллаев 42 келіліктер арасында үшінші орын, Ернар Жолдас 65 келілік салмақ дәрежесі бойынша үшінші орын тұғырына көтерілді.
Жүлделі қайтқан өрендеріміз қазіргі уақытта наурыз айының 29-да Алматы қаласында өтетін даңқты спортшы Дәулет Тұрлыханов атындағы турнирге дайындық үстінде. Жауырыны жерге тимеген Қажымұқан Мұңайтпасовтың заңды жалғасына айналған жігіттерге алар асуларың көп болсын деген жылы лебізімізді жолдаймыз.
Ақтілек БІТІМБАЙ
