Еламан ерледі, Бағдат барын салды

Алматы қаласында жақын күндері грек-рим күресінен Олимпиада және әлем чемпионы Шәміл Серіковті еске алуға арналған халықаралық турнир өтті. Дүбірлі додаға Қырғызстан, Өзбекстан және Қазақстан Республикасының балуандары қатысты.

Халықаралық турнирде жерлестеріміз, №17 Қазалы ауданының олимпиадалық резервтің мамандандырылған балалар жасөспірімдер спорт мектебінің спортшылары Еламан Аюп пен Бағдат Үсеновтер де өз бақтарын сынады. Туған жердің үмітін үкілеп барған қос балуан сенім үдесінен шықты. 82 келі салмақ дәрежесінде өнер көрсеткен Еламан Аюп алтынан алқа тағынып, Қазақстан Республикасының спорт шебері нормативін орындады. Ал, 87 келілік Бағдат Үсенов күміс медальді қанжығасына байлады. Балуандарды халықаралық жарысқа дайындаған тәжірибелі бапкерлер, әкелі-балалы Сапарбек пен Қанат Көбегеновтер екенін айта кеткен орынды.