Дойбы додасы

Өткен аптада Ардагерлер үйінде «Нұр Отан» партиясы Қазалы аудандық филиалының ұйымдастыруымен мүмкіндігі шектеулі қариялар арасында дойбыдан жекелей жарыс өткізілді. «Ардагерлерді ардақтайық» атты партиялық жобасын іске асыру мақсатында өткен сайыс дойбы ойынын кеңінен насихаттап, салауатты өмір салтын қалыптастыруды көздеді.

Ойлау мен шапшаңдықты талап ететін сайыста аудандық денешынықтыру және спорт бөлімінің бекіткен төрешілер алқасы басшылық етті. Қазақстан Республикасының дойбы федерациясы бекіткен ереже бойынша өткен ойын барысында бірінші орынды Нұрбай Мәмбетов жеңіп алды. Екінші орынды Балтабай Ибраимов иемденсе, Жайылхан Оразымбетов үшінші орынды қанжығасына байлады.

Жүлдегерлерге «Нұр Отан» партиясы Қазалы аудандық филиалының арнайы дипломдары мен бағалы сыйлықтары табыс етілді.