Қазалы Qazaly.kz ақпараттық агенттігі
» » Баскетболшылар бақ сынасты

Баскетболшылар бақ сынасты

Қазалылық жұртшылық “Тамыры терең, тарихы кенен Қазалы” атты жинақ кітапта құнды зерттеулерімен танылып, “Атамекен”, Қазалым – қарашаңырағым” секілді кітаптар жазған Қанай Сәрсеновты жақсы таниды. Бірнеше жыл Ғани Мұратбаев атындағы мемориалдық музейде басшылық қызметте болып, облыстық білім басқармасының, білім және ғылым министрлігінің Құрмет грамотасына ие болған нар тұлға ауданның рухани тұрғыда дамып-жетілуіне аз тер төккен жоқ. Бұдан бөлек грек-рим күресінен спорт шебері атанып, жергілікті жастардың салауатты өмір салтын ұстануына да айрықша ықпал етті. Аудандық білім бөлімі мамандары “жақсының аты өлмейтінін” тағы бір мәрте дәлелдеп, баскетболдан біртуар азаматты еске алуға арналған сайыс өткізді.

Спорттық шара басталмас бұрын аудандық білім саласы ардагерлер кеңесінің төрағасы Серік Қуанышбаев пен №216 мектеп директоры Зейнегүл Жүсіп сөз сөйлеп, Қанай Тоққожаұлының өмір жолы мен еткен еңбегінен сыр шертті. Сайысқа қатысушы командаларға сәттілік тілеп, спорттық сайыстардың тәрбиелік маңызына тоқталды.

Бұдан соң кенттегі 8 мектептің намысын қорғауға жиылған командалар сайысты бастап кетті. Бірнеше сағатқа созылған ойынның нәтижесінде үздік ойын өрнегімен көзге түскен спортшыларға номинациялар берілді. Мәселен, №266 мектеп-лицейдің оқушысы Мақсат Өтелбай сайыстың “Үздік қорғаушысы” атанды. №216 мектептің шәкірті Жәнібек Серікұлы «Үздік үйлестіруші» ал №249 мектеп-лицей құрамасының ойыншысы Бабабек Әділбаев “Үздік ойыншы” бағамына лайық деп танылды. Сондай-ақ №234 мектеп оқушысы Ринат Өмірбек “Үздік шабуылшы, №216 мектеп командасының белсенді спортшысы Қыдыржан Айтқожа «Ең жас ойыншы» атанды.

Қанай Сәрсеновты еске алуға арналған спорттық сайыс қорытындысы бойынша Айнұр Сәндібаев баптаған №234 мектеп командасы жеңімпаз атанды. Екінші орын Жамбыл Құлназаров жаттықтырған жігіттерге, №216 мектеп баскетболшыларына бұйырды. Ал Мұратбек Бақбергеновтің №266 мектеп-лицейден жасақтаған командасы үздік үштікті қорытындылады. Сайыс жеңімпаздарына бағалы сыйлықтар табысталып, қатысушылар естелік суретке түсті.
Ринат ӘБДІҚАЛЫҚ
28 қыркүйек 2019 ж. 1 095 0

Жаңалықтар мұрағаты

«    Наурыз 2024    »
ДсСсСрБсЖмСбЖс
 123
45678910
11121314151617
18192021222324
25262728293031