Жаттығу – жанға дауа
Бүгінгі таңда “Шынықсаң шымыр боларсың” деген сөздің шынайылығына толықтай көз жеткіздік. Алайда ғалымдар мен зерттеушілер спортпен айналысудың денсаулық үшін пайдасы орасан екенін қанша мәрте дәлелдеп берсе де еріншектікке салынатындар баршылық. Бұған жаттығу орталықтары мен спорт ойындарына арналған алаңдардың аздығы әрі қолжетімсіздігі де кедергі болып отырғаны жасырын емес. Дей тұрғанмен қазіргі таңда аталған мәселе кезең-кезеңімен шешімін тауып келе жатқанын айту керек.Елдің Тұңғыш Президенті “Жаңа онжылдық – жаңа экономикалық өрлеу – Қазақстанның жаңа мүмкіндіктері” атты Жолдауында 2020 жылға дейін бұқаралық спортпен шұғылданушылардың санын 30 процентке жеткізуді тапсырған болатын. Бұдан кейін облыс, қала, аудандар мен ауылдық округтерде көпшіліктің қызығушылығын тудыратын нысан бой көтеріп, алаңдар жасақтала бастады. Жақында кент орталығындағы – “Мелиоратор” мөлтек ауданынан пайдалануға берілген жаттығу алаңы соның бір көрінісі.
Әйтеке би кентінің оңтүстік шығыс беткейіндегі бұл екі қабатты көп пәтерлі 23 үйде үш жүзден астам пәтер орналасқан. Бірнеше жылдан бері тиісті сала өкілдерінің күш салуымен келбеті әрленген мөлтек ауданда 1550 тұрғын тұрады. Солардың бос уақытын қауіпсіз және тиімді өткізуін қамтамасыз ету, физикалық тұрғыда салауатты өмір салтын қалыптастыру мақсатында ашылған бұл спорт алаңы қазірдің өзінде күніне ондаған келушілерге қызмет етуде. Әйтеке би кенті әкімдігінің есеп және шаруашылық бөлімінің басшысы Марат Сейтекеннің айтуынша, тұрғындар жаңа нысанға дән риза.
– 2019 жылы «Мелиоратор» мөлтек ауданын бұқаралық спорттық алаңмен қамтамасыз ету жұмыстарына аудандық бюджеттен 6,0 млн теңге бөлініп, мемлекеттік сатып алу конкурсы бойынша «ҚазалыСтройСервис» серіктестігі мердігер мекеме деп танылды. Жоба бойынша тиісті жұмыстар толық атқарылып, пайдалануға берілді.
Біз үшін азаматтардың салауатты өмір салтын ұстануы, сол арқылы денсаулығы мықты болғаны маңызды. Алдағы уақытта да ел игілігі үшін атқарылатын жұмыстар кенжелеп қалмақ емес, – дейді ол.
Айта кетейік, қазіргі таңда ауданда бұқаралық спортпен айналысушылар саны 28 процентті құрайды. Мұнда 30-дан астам спорттық жасанды алаң бар. Оның басым бөлігі 2011-2013 жылдары елді мекендерді әмбебап жасанды жасыл алаңмен қамту бағдарламасына сәйкес салынған. Жекеменшік әріптестік негізінде Әйтеке би кентіне жаттығу залы мен бассейн салу жоспарлануда.
Ринат ӘБДІҚАЛЫҚ
