«Шин-Лайн» ЖШС-ның сиыр етінен жасалған тефтели жартылай дайын өнімінен таңбалауда көрсетілмеген жылқы мен тауықтың ДНҚ анықталыпты. «Столичный» маркалы сиыр етінен жасалған фаршта жылқы етінің ДНҚ-сы жүр. Тексерушілер бұл өнімді өндірген өндірушіні таба алмай әлек. Өйткені, таңбалауда өндіруші атауы жазылмаған.

«Мариям» жеке кәсіпкерлігінің «Охотничьи колбаски» маркалы қайнатылып-кептірілген шұжығы сиыр мен тауық етінен жасалған деп жазылғанымен, онда сиыр еті мүлде жоқ болып шықты. «Троя» жеке кәсіпкерлігі өндірген «Мусульманский» сервелатының құрамында сиыр еті бар деп жазылғанымен, ол өнім тек тауық етінен өндірілгені белгілі болған. Осы фактілерден кейін Қоғамдық денсаулық сақтау комитеті өндірушілер өніміне жіті назар аударуды ескертіп отыр. Бұл фактілер өндірушілердің өнім өндіру технологиясын өрескел бұзатынын, өндірістік бақылау жасалмайтынын, өнім таңбасына өтірік ақпар жазу арқылы тұтынуны құқын бұзып отырғанын көрсетеді дейді. Осы оқиғадан соң комитеттің аумақтық департаменттері өнім таңбасында белгіленген қоспалары жоқ өнімдерді сөрелерден алып тастап, жауапсыз өндірушілерге қатысты шара қолданып жатыр. Ал тұтынушылар дүкен сөрелерінен осындай өнімдерді көріп қалса, Қоғамдық денсаулық сақтау комитетінің аумақтық департаменттеріне немесе kooz.dsm.gov.kz/ru сайтына хабарласуды өтініп отыр.

Тұмар МЫРЗА