Қазалы Қазалы аудандық қоғамдық-саяси газет
» » Тірлігі бекем таратушылар

Тірлігі бекем таратушылар

Аудандық «Қазалы» газеті 2014 жылдан бері облыс әкімінің бастамасы және қолдауымен «Сыр медиа» серіктестігіне біріктіріліп, форматының көлемі ұлғайтылды. Типографиялық сапасы артып, түрлі-түсті бояумен шығарыла бастады.

Сонымен қатар, серіктестікке қарағалы бері газет редакциясы жанынан тарату бөлімі ашылып, жүйелі жұмыс жасап келеді. Бұл бөлімде отыз бес таратушы тұрғындарға қалтқысыз қызмет көрсетуге күш-мүмкіндікті жұмылдыруда.

Күйбең тірлікке толы таратушы жұмысының қызығымен қатар қиын тұстары жетіп артылады. Қыс мезгілінің қақаған аязына, шілденің шіліңгір ыстығына қарамастан «оқырмандар газетті уақытылы оқысын» деп еңбек ететін таратушыларда тыным жоқ. Алайда, кейбір тұрғын үйлердің сыртында арнайы пошта жәшігінің тұрмауы, көше атауы мен үй нөмірінің жазылмауы біраз қиындық туғызатындығы жасырын емес.
Олар: «Бірнеше көшеге газет таратамыз. Көп жағдайда газет-журнал салуға арналған арнайы жәшіктің болмауынан есікке қыстырып кетуге тура келеді. Газет таратқан уақытта жұмыста болған үй иелері келгенше ауа райының желді, жаңбырлы күнінде газет ұшып немесе ылғалданып қалатын сәттер де кездеседі. Бұндайда тұрғындар таратушыларға ренішін білдіріп жатады. Екі тарап арасында осындай түсініспеушіліктің туындамауы үшін әр үйде көше атауы, арнайы пошта жәшігі орналастырылса», – деген өтініш-тілегін жеткізді.

Ал, «Қазалы» газеті тарату бөлімінің менеджері Арман Оразғалиевтың айтуынша, тарату бөліміне газет әр аптаның сейсенбі, бейсенбі және сенбісінде баспаханадан жеткізіледі. Осы күндері тұрғындарға газеттер таратылуы тиіс. Әйтеке би кентінде 15, Қазалы қаласында 2, ауылдық округтерте 20 таратушы бар. Әріптестердің барлығы дерлік жұмысына жауапты. Бастапқы кезде қиындық кездескені рас, қазіргі таңда таратушылар көшелер мен үйлердің реттілігін жақсы біледі.

«Қазалы қаласындағы Абай көшесінің тұрғынымын. Күнделікті теледидар жаңалықтарын тыңдап, газет-журнал оқу үйреншікті дағдым. Аптаның қай күні қандай газет шығатынын да жақсы білемін. Әсіресе, «Сыр медиа» серіктестігіне қарасты «Қазалы» газеті редакциясының тарату бөлімі арқылы таратылатын газеттер қай күні шықса, сол күні қолыма жетеді. Оқырман үшін бұдан артық қуаныш бар ма? Ең бірінші кезекте өзіміздің облыстың, ауданның жаңалықтары қызықтырады. Сол себепті болар, «Қазалы» газеті редакциясының таратушыларын асыға күтемін», – дейді Е.Ұзақбаев.

Ұлболсын ТАЛАПБАЕВА

05 қаңтар 2019 ж. 367 0

Жаңалықтар мұрағаты

«    Тамыз 2019    »
ДсСсСрБсЖмСбЖс
 1234
567891011
12131415161718
19202122232425
262728293031