«Білім – инемен құдық қаз­ғандай» екенін білеміз. Ал, 11 жылдық оқудың нәтижесі мектеппен қоштасар сәтте тапсырылатын ҰБТ-ның қортын­дысымен көрінетіні рас. Осынау тестілеуде біреудің бағы жанса, екіншісінің бабы келіп, мәре-сәре күйге түсіп жатқанын көзбен көріп жүрміз.

Жалпы, биылғы жылы Қаза­лы ауданында 799 мектеп бітіруші болса, оның 555-і тесті­леуге қатысқан. Білім бәсе­кесінде 336 оқушының жолы болып, олар республикамыздағы жоғарғы оқу орындарының гран­ты­на қол жеткізген екен. Айта кетерлігі, түлектердің ішінде 3 оқушы Ресейдің Санкт-Петербург қаласындағы К.А.Тимирязев атындағы аграр­лық университетінің гранттарын иеленген. Олар М.Горький атындағы №16 мектеп-лицейінен Бауыржан Құттыбайұлы, Қ.Пірім­ов ауылындағы №92 мектептен Бейбарыс Құлтан, №266 мектеп-лицейінен Бақыт Сәбитов секілді оқушылар екенін айта кеткен жөн.

Сонымен қатар, 2017-2018 жылғы бітірген жас түлектердің арасында еліміздегі бірқатар оқу орнының ректорларының грантын иеленген шәкірт­тер де бар.