Алаш жұртының ақ отауына айналған Астана қаласының 20 жылдығы Елорда төрінде дүркіреп өткені көпшілікке мәлім. Еліміз тәуелсіз ел атанып, қырық қабырғалы жұртымыз бір шаңырақтың астына топталғалы тойдан кенде еместігіміз айқын. Бірақ, «Бұл ән бұрынғы әннен өзгерек» дегендей, республиканың бірінші қаласы саналатын Астананың қазақ тарихында алар орны ерекше. Елбасының төл туындысына айналған бұл қала жасампаздық пен жақсылықтың, қат-қабат қуаныштың символы іспеттес екені айтпаса да түсінікті.

Күллі қазақ көз жауһарына айналған Астананың 20 жылдығын тойлап, шат-шадыман күйге кенеліп жатқанда, шілденің 6-сы күні Қазалы ауданында 1 ұл және 1 қыз бала дүние есігін ашты.

Осыған орай, мереке қарсаңында аудандық орталық аурухананың перзентхана бөліміне аудан әкімі Мұрат Ергешбаев пен аудан әкімінің орынбасары Әлімжан Жарылқағанов бастаған ел ағалары арнайы ат басын бұрды.

«Қуаныш бөліссең көбейеді» деген тәмсілді ұстанған аудан басшылары осындай ерекше күнде өмірге перзент әкелген Бекарыстан би ауылының тұрғыны Айжан Қожақова мен Әйтеке би кентінің тұрғыны Гүлмира Серікті мерейлі мерекемен құттықтап, қуаныштарымен бөлісті.

Мұнымен қоса, аудан әкімі М.Нәлхожаұлы қос мерекеге кенелген аналарға гүл шоқтары мен сый-сияпаттар табыстады. Ал, өз кезегінде жас аналар аудан басшыларына ризашылықтарын білдірді.

Айта кетейік, Сыр халқының демографиясына ерекше үлес қосып келе жатқан Қазалы ауданында жыл басынан бүгінгі күнге дейін 838 бала өмірге келген.