Қазақстанда 33 градусқа дейін аяз болып, боран соғады
Синоптиктер Қазақстанда алдағы күндері қанша градусқа дейін аяз болатынын айтты, - деп хабарлайды Tengrinews.kz.
Кең антициклонның әсерінен Қазақстанның басым бөлігінде ашық аязды ауа райы болжанады. Тек еліміздің батысы мен оңтүстік-шығысында тұрақсыз ауа райы күтіледі, қар түрінде жауын-шашын жауады және де боранмен жел күшейеді.
"Негізгі температуралық фон Республикамыздың солтүстігінде, шығысында және орталығында түнде 25-33 градус, күндіз 15-23 градус аяз, оңтүстікте және оңтүстік-шығыста түнде 5-15, күндіз 2-7 градус аяз, ал батыста түнде 8-18 градус аязға дейін, күндіз 3-15 градус аязға дейін күтіледі", - делінген хабарламада.
