Дана сөздің дарасы

Кеш шымылдығын Майдакөл ауылдық кітапханасының тұрақты оқырманы, жас ақын, «Қазақстан Жастарының «Алтын кітабы» атты Республикалық байқаудың жеңімпазы, Республикалық «Ақберен» байқауының І және ІІІ орын иегері Бекзат Әбдіханның ақын рухына арнаған жыр арнауымен ашылды. Аталмыш шарада сөз сөйлеген Қазалы аудандық мәдениет және спорт бөлімінің басшысы Болат Әбенұлы:

– Қазақстан елін әлемдік өркениет көшіне жол тартқызған дара ақын шығармашылығында ұлттың бар болмыс-бітімі, тұрмыс-тіршілігі, көзқарасы мен дүниетанымы, діні мен ділі, өткір тілі мен қайсар рухы – бәрі де айқын көрініс тапқан. Кемеңгер ақынның мол мұрасы – талай ғасыр өтсе де маңызын жоймайтын адамзаттың рухани қазынасы. Басты мақсат – Абайдың дүниетанымын және оның рухани мұрасын жастарға кеңінен таныту, ақынның шығармаларын насихаттау жолдары мен тәсілдері жылдан жылға түрленіп, кемелденуі керек, – деген тілегін білдірді.

Майдакөл ауылдық кітапханасының оқырманы №98 мектептің 9-сынып оқушысы Төлепберген Жұлдызай, Ақтан батыр ауылдық кітапханасының оқырманы № 190 мектептің 4-сынып оқушысы Абай Ғанибекұлы, Жалаңтөс батыр ауылдық кітапханасының №103 мектептің 9 сынып оқушысы Хайрулла Ақжан, Сарбұлақ ауылдық кітапханасының оқырманы Жеңісбек Аяжан, Жанқожа батыр атындағы №70 мектептің 7-сынып оқушысы Аяна Дәуітбай ақынның сырлы да, жырлы өлеңдерін жатқа айтса, қарасөздерін мәнеріне келтіре оқып, Абай рухына үлкен құрмет көрсетті. Мұстафа Матаев атындағы № 170 мектеп оқушысы Нұрлан Мейірхат ақынның сөзіне жазылған «Бойы бұлғаң» әнімен тыңдармандарды сүйсіндірді.

Мерекелік жиын барысында аудандық Мәдениет және спорт бөлімінің басшысы Болат Әбенұлы әдеби-әуезді кешке белсене қатысқан оқушыларға алғыс хаттар мен естелік сыйлықтар табыстады. Кеш соңы мәдениет үйінің өнерпаздарының орындауындағы әсем әуенмен қорытындыланды.