Жобадағы жұмбақ жан
Биыл Қазалы ауданының мәдениет және тілдерді дамыту бөлімінің қолдауымен және Р.Бағланова атындағы аудандық мәдениет орталығының ұйымдастыруымен «Бізбен бірге» атты ауқымды жоба қолға алынған болатын. Екі кезеңге ұласқан сұхбаттың алғашқы кешіне ауданның спорт саңлақтары шақырылса, екіншісінде сөз шебері асабалар жиналды. Бағдарлама соңында «келесі қонақ жұмбақ жан» деп хабарлаған еді.Бүгінде жалғасын тапқан сүбелі сұхбат сәуір айының 29-ыншы жұлдызында өтті. Көптен күткен кештің жұмбақ қонағы азулы ақын, композитор, әйгілі әнші Шынберген Сүлейменов және оның бала күннен тай құландай тебісіп өскен досы Байназар Омаров болды. Кеш қонақтары сахна төрінен орын алып, көрерменге шайырдың өмір мен өнер жолынан сыр шертті. Елге танымал эстрада жұлдыздарының құттықтауы арқылы көпшілік назарына бейнебаяны ұсынылды.
Ақынға ұяшықта орналасқан қызықты сұрақтар қойылып, бағдарлама әзіл-сықақты әңгімеге ұласты. Шынберген Байқараұлы өзінің «Алланы тану», «Мектепке сағыныш», «Кездесерміз біз әлі», «Ақұдайлар», «Сыр елі», «Сүйкімді», «До ре ми», «Анашым», «Ауылым», «Айналайын» атты тыңдарман жүрегінен орын тапқан, бірқатар туындыларын жанды дауыста орындап, көрермен көңілін бір серпілтіп тастады.
Мәдениет орталығының басшысы Ғани Дармағамбет және Әлия Ермекбаева сынды өнерпаздар Шынберген шығарған әндерді шырқады.
Онан соң аудан әкімі Мұхтар Оразбаев Шынберген Сүлейменовке жүрек жарды лебізін айтып, ыстық ықыласымен «Алғыс» хат табыстады. Кеш бағдарлама әнұранына айналған «Бізбен бірге» әнімен тәмамдалды.
Айта кетейік, ауқымды жоба мамыр айының соңғы күндерінде өз жалғасын тауып, кезекті құрметті қонағына сахна төрінен орын бермек.
Серік АҚМЫРЗА
