Шара шымылдығын орталық өнерпазы Жанболат Өмірзақ «Біздің жігіттер» әнімен ашты. Ұрыста ерлікпен қаза тапқан батырларды еске алу құрметіне, бір минут үнсіздік жарияланды.

Онан соң аудан әкімінің орынбасары Дәурен Оңғарбайұлы:

– Құрметті жерлестер, қадірлі тәжік-ауған соғы­сының ардагерлері, өздеріңіз білетіндей, 1995 жылдың 7-інші сәуірі ел тарихындағы елеулі күндердің бірі. Сол кезде елдер арасындағы бітімгершілік операция­сы ұйымдастырылып, ұрысқа 9 мыңға жуыққазақ жауын­герлері қатысты. Жеңіс туының желбіреуіне қазалылық 27 жауынгер өз үлестерін қосты.

Біз қашанда елі – ерін құрметтеген халықтың ұрпағымыз. Ұлы Отан соғысының лайықты ізбасары ретінде, ерліктеріңізді келешек жастарға үлгі етеміз. Келешек жас буын Тәуелсіз көк аспанның астында өмір сүрсін дегім келеді. Отбасыларыңызға амандық, дендеріңізге саулық тілеймін. Еліміз аман, жұртымыз тыныш болсын, – деп сөз қайырып, біршама майдангерге төсбелгі тақты және аудан әкімінің Алғыс хатымен марапаттады.

Одан кейін Қазалы аудандық қоғамдық бірлестігінің төрағасы Руслан Әбдусаттарұлы бірнеше азаматқа арнайы Алғыс хат табыстады. Кеш соңы мәдениет орталығы өнерпаздарының әсем әнімен тәмамдалды.