Қазалы аудандық сотында ҚР ҚК-нің 297 -бабының 1-бөлігімен айыпталушы А.-ға қатысты қылмыстық іс қаралды.

Қылмыстың іс құжаттарына қарағанда, сотталушы А. өз үйінің ауласында азамат Ғ.-ға 3 000 теңгеге заңсыз сақтаған 3 дана қағаз орамындағы салмағы тиісінше 2,67 грамм болып табылатын гашишты заңсыз өткізген.

Содан соң «Нұр-Шуақ» аялдамасының алдында сотталушы А. мініп келе жатқан Р.-ның басқаруындағы «Ауди» маркалы автокөлікке тінту жүргізу барысында 2 дана пакетке оралған жалпы салмағы 1032 грамм кептірілген марихуана алынған.

Содан соң сотталушы А.-ның үйіне тінту жүргізу кезінде, сотталушының кәмелетке толмаған баласы А-ның сөмкесінің ішінен 42-дана газет қиындысына оралған жалпы салмағы 68,19 грамм кептірілген марихуана алынған.

Басты сот талқылауында сотталушы А.-ның айыбы, өзінің кінәсін толық мойындап берген жауабы, куәлардың жауаптары, сараптама қорытындыларымен, істегі жинақталған басқа да құжаттармен толық дәлелденіп бекітілді.

Сот үкімімен сотталушы А. ҚР ҚК-нің 297-бабының 1-бөлігінде көзделген қылмыстық құқық бұзушылық жасағаны үшін кінәлі деп танылып, оны 6 жылға бас бостандығынан айырып, жазаны қылмыстық-атқару жүйесінің орташа қауіпсіз мекемелерінде өтеуі белгіленді.

Сот үкімі заңды күшіне енген жоқ.