"Берілген іс сапалы әрі мерзімінде аяқталуы тиіс"
Аудан әкімі Мұхтар Оразбаев Әйтеке би кентіндегі №226 мектеп-гимназияға арнайы барып, ғимаратқа қосымша салынып жатқан спорт зал құрылысымен танысты.Аудан басшысы мердігер мекеменің жауапты қызметкеріне құрылыс жұмыстары кешуілдеп жатқанын ескертті.
– Енді шамалы күннен кейін оқушылар мектеп табалдырығын аттайды. Бұл дегеніміз осында оқитын 800-ге жуық балаға қауіпті деген сөз. Құрылыс жүріп жатқан аумақты тез арада қоршап қойыңыздар. Содан кейін жұмысшылардың санын көбейтіп, құрылыс жұмыстарын сапалы әрі тез арада аяқтаңыздар, – деді Мұхтар Әуесұлы.
Осы арада өткен жылы Б.Мергенбаев атындағы №226 мектеп-гимназия ғимаратына күрделі жөндеу жұмыстары жүргізілгенін айта кеткен жөн.
Аудан әкімі Мұхтар Оразбаев мұнан соң Әбілқайыр хан көшесіне барып, көшені қайта жаңғыртудан өткізіп жатқан «Кочевник» ЖШС-ның жауапты қызметкерімен кездесті.
– Бұл көшені жөндеу үшін қыруар қаржы бөлінді. Сондықтан жөндеу жұмыстарын тезірек аяқтау қажет. Әйтпесе шаңы аспанға ұшып әлі жатыр. Көше тұрғындарынан Сіздердің жұмыстарыңызға қатысты сын-ескертпелер көп. Алдағы уақытта техникалардың санын көбейтіп, жол жөндеу үшін қажетті материалдарды тезірек алдырыңдар. Себебі белгіленген жұмыстар сапалы әрі мерзімінде аяқталуы керек, – деді аудан басшысы.
"ҚАЗАЛЫ" ақпарат
