7 мыңнан астам тұрғын емханаға тіркелмеген
Облыс әкімдігінің ситуациялық орталығында облыс әкімінің орынбасары Балжан Шәменованың қатысуымен МӘМС жүйесіндегі сақтандыру мәртебесіне байланысты штаб отырысы өткізілді. Оған денсаулық сақтау, білім, жұмыспен қамтуды үйлестіру және әлеуметтік бағдарламалар, ішкі саясат басқармаларының басшылары мен «ӘМСҚ» КЕАҚ облыс бойынша филиал директорының міндетін атқарушы Жұпар Алхожаева, аудан әкімдерінің орынбасарлары мен өзге де сала мамандары онлайн режимде қатысты.Облыс әкімінің орынбасары Балжан Шәменова әлеуметтік медициналық сақтандырудың толықтай енгізілгеніне біршама уақыт болса да, жүйенің іске асырылуында кедергілер барын айтты. Осы орайда тақырыпқа байланысты филиал директорының міндетін атқарушы хабарлама жасады.
Бүгінде сақтандырылмаған азаматтардың саны көбейген. Облыс бойынша 800 мың тұрғынның 654 мыңнан астамы сақтандыру мәртебесіне ие. Биылғы 1 сәуірдегі дерек бойынша облыста МӘМС жүйесінде сақтандырылмағандар 141986 адамға жетіп, олар медициналық көмекті толыққанды алу мүмкіндігінен айырылып отыр. Осы орайда Жұпар Алхожаева сақтандырылмаған азаматтардың тізімін мәлімет үшін ай сайын қалалық, аудандық әкімдіктер мен медициналық мекемелерге және облыстық кірістер департаментіне жолданып отырғанымен, атқарылған жұмыстың мардымсыз екенін айтты. Алдағы уақытта халық арасында МӘМС пакетіндегі медкөмекті алмағаннан аймақтағы пандемия салдарынан онсыз да қордаланған әлеуметтік мәселелердің шиеленісуі мүмкін екенін де ескертті. Ол баяндамасында қала мен аудандарда «МӘМС жүйесіне тарту» жұмысшы тобын құрып, оған жергілікті әкімшіліктің лауазымды тұрғаларын бекітіп, халық арасында күшейтілген ақпараттық-түсіндірме жолмен сақтандыру мәртебесіне өткізуді қолға алу керек деген пікір білдірді.
Сондай-ақ, орта арнаулы және жоғары оқу орындарында күндізгі нысанда оқитын студенттер туралы мәліметтерді арнайы ғылыми-білім беру деректер базасына тіркеу туралы тапсырмалар тиісті деңгейде орындалмағаны айтылды. Оқудан шығарылған немесе оқуға қабылданған жағдайда әр семестр сайын базадағы мәліметтерді жаңартып отыру қажет. Биылғы 4 айда қордың облыстық филиалына «Қолдау-24/7» мобильдік қосымшасы арқылы 29 студенттен өтініш түсіп, оларға уақытша сақтандыру мәртебесі берілген. Директордың міндетін атқарушының айтуынша, өңірде 7 мыңнан астам тұрғын емханаға тіркелмеген. Осы ретте облыстағы әрбір медицина ұйымында «бестіктер» құрылып, мамандар МӘМС жайлы каскад әдісімен мекеменің қызметкерлерін тұрақты оқытуда.
Жиын барысында өзге сала мамандары тақырыпқа байланысты ұсыныс-пікірлерін ортаға салып, сауалдарын жолдады. Өз кезегінде облыс әкімінің орынбасары МӘМС жүйесіне байланысты халық арасында үгіт- насихат жұмыстарын кеңінен жүргізуді тапсырды.
