Дау-дамай азайды
Сейсенбіде Қазалы аудандық соты 2020 жылдағы сот әділдігін жүзеге асыру барысында атқарған жұмысы жайлы онлайн баспасөз мәслихатын ұйымдастырды. Онда сот төрағасы Дидар Мұратбекұлы қылмыстық істер бойынша сот өндірісіне барлығы 98 іс түскендігін мәлімдеді. Оның барлығы қаралып аяқталған.Сот төрағасының айтуынша, азаматтар арасында заңсыздыққа бару тыйылмай тұр. Бармақ басты, көз қыстыға жол берген сыбайлас жемқорлық санатында 3 қылмыстық айғақ қаралды. Қаншама адамның тағдырына балта шапқан есірткі айналымына орай 27 сотталушыға айыптау үкімі қабылданған.
– “Сұлулық әлемді құтқарады” деген сөз бар. Әттегені сол нәзікжандылар аудандық сот есігін жағалап жүр. Яғни әйелдерге байланысты 2 дерек бойынша айыптау үкімі шығарылды. Медиаторлардың қатысуымен 11 құжат тексеріліп аяқталған. Аудандық сотта қылмыстық істерді қарау барысында процессуалдық мерзімдері бұзылу фактілері орын алмады, – дейді Дидар Мұратбекұлы.
Онлайн жүздесуде есепті мерзімде азаматтық іс бойынша 917 арыз, 51 құжат түсіп, оның ішінде 69-ы кері қайтарылғандығы баяндалды. Ал 15 арыз қабылдаудан бас тартылған. 688 талап-арызбен азаматтық іс қозғалған. Барлығы 857 дерек зерттелді. Медиация арқылы 80-ні аяқталып, 3-еуі бітімгершілік келісім арқылы тоқтатылған. Татуластыру рәсімдерін жүргізуге болатын 631 арыздың ішінде 83-і ортақ мәмілеге келу арқылы шешілген. Сөз арасында сот төрағасы бұқаралық ақпарат құралдарының ақпараттандыруымен дау-дамай азайғандығын қуана жеткізді. Өкініштісі неке бұзу фактісі тыйылмай тұр. Нақты айтқанда, 113 отбасының шырқы бұзылды.
Сонымен қатар әкімшілік істе 507 дерек тіркелген. Оның ішінде 20-сы біріктіріліп, 466-сы қаралған. Ал 29-ы тоқтатылып, 46 адамға ескерту жазасы қабылданды.
Сондай-ақ 221 адамға әкімшілік айыппұл салынып, 164 қазалылық заң тәртібін ұстанбағандықтан әкімшілік қамауға алынған.
Айнұр ҚАЗМАҒАМБЕТОВА
