2020-2021 қысқы маусымы жолшылар үшін 6-қазаннан басталды. Қысқы күтіп ұстау бойынша жұмыстар қазір Ақмола, Қарағанды, Шығыс Қазақстан, Қостанай, Алматы және Солтүстік Қазақстан облыстарында жүргізіліп жатыр, деп хабарлайды Today.kz тілшісі ҚР Индустрия және инфрақұрылымдық даму министрлігінің сайтына сілтеме жасап.

Бүгінде республикалық жолдарда арнайы техниканың 455 бірлігі жұмылдырылған. Көктайғаққа қарсы қоспалар себіліп, жолдар қардан тазартылып жатыр. Бұдан бөлек, қар борайтын учаскелерде арнайы қоршаулар орнатылуда. Жалпы республикалық маңызы бар автомобиль жолдарында осындай кедергілердің 37880 метрін орнату көзделген.

Биыл 24,8 мың шақырымды қысқы күтіммен  қамту жоспарланып отыр. Соның 20,2 мың шақырымы «Қазақавтожол» ЖШС-не тиесілі. Қалған 3,9 мың шақырымына қайта жаңарту және күрделі жөндеу объектілеріндегі  мердігер ұйымдар және 682 шақырымына «Ақылы автомобиль жолдары дирекциясының» филиалы жауапты болмақ.