«Үздік оқырман – 2020» байқауы

Аудандық орталық кітапхананың оқырмандарға қызмет көрсету бөлімінің ұйымдастыруымен Бүкіләлемдік кітап және авторлық құқық күніне орай «Үздік оқырман – 2020» жас оқырмандар байқауы онлайн форматта өткізілді.
Байқаудың мақсаты – оқырмандардың дүниетанымын кеңейтуге, көркем шығарманың мәнін сезініп, оқығандарын дұрыс бағалай алуға, өмірде, еңбекте, оқуда, кітапты пайдалануға ­баулу, тарихи-мәдени және рухани мұрамызды сақтау, жастарды отаншылдыққа, өнегелілікке тәрбиелеу.
“Үздік оқырман” байқауы биыл бесінші рет ұйымдастырылып отыр. Сайысты бақылап, оған баға беретін қазылар алқасының төрайымы аудандық орталық кітапхананың оқырманы, ардагер ұстаз Айжаһан Ысқақ пен мүшелері аудандық «Қазалы» газетінің тілшісі Абзал Жолтерек, аудандық мәдениет және тілдерді дамыту бөлімінің әдіскері Қарлығаш Таңатар болды.
Мазмұнды шараға Қ.Сәтбаев атындағы №216, Қ.Пірімов атындағы №103, №170 Ғ.Мұратбаев атындағы №17 орта мектебі мен №266 мектеп-лицей шәкірттері қатысып, өзара бақ сынасты.
Нәтижесінде үшінші орынды №170 орта мектебінің 9 сынып оқушысы Гүлсезім Бимырза, екінші орынды №266 мектеп-лицейдің 10 сынып оқушысы Данияр Әбілқасым, Қ.Сәтбаев атындағы №216 орта мектебінің 9 сынып оқушысы Ақерке Тілектес, бірінші орынды Ғ.Мұратбаев атындағы №17 орта мектебінің 11 сынып оқушысы Мақсат Оңталап, бас жүлдені Қ.Пірімов атындағы №103 орта мектебінің 10 сынып оқушысы Динара Хайрулла иемденді.

Н.ӘЖІҒҰЛОВА,
аудандық кітапхана қызметкері