Жеке есепшоттарыңызға сақ болыңыз, вирус тарады!
Жеке есепшоттарыңызға сақ болыңыз! Елімізде компьютерлік вирус тарады. Мамандар осылай дабыл қағып отыр. Әзірге одан ешкім зиян шекпегенмен, қаражатынан айырылып жер сипап қалу қаупі басым. Бұл туралы Caravan.kz медиа-порталы хабарлайды. «Lokibot» вирусы бүгінде ІТ мамандарының бас ауруына айналды. Себебі сенімсіз сервер жүктеп, күмәнді қосымша қондырғанда зиянды файл бірден ілесіп компьютерге немесе телефонға орнығып алады. Сөйтіп жеке мәліметтерді жинаудан бөлек, құпия ақпаратты да ұрлауға бейім.
Бұл негізінен онлайн банкинг пен жеке есепшоттан ақша қымқыру үшін жасалғанын айтады.
Вирус бізге беймәлім еді. Соңғы күндері ғана белгілі боп жатыр. Бірақ Ресейде 2017 жылы, Еуропада одан ертерек белгілі болған. Күресудің жолы – тек сақтық. Бұдан бөлек жалған мобильді қосымшалар арқылы алдау да белең алған. Яғни бір бағдарлама жүктеп аларда жеке мәлімет сұралатыны баршаға мәлім. Дегенмен кейде артық және күмәнді ақпарат талап етіледі. Сондықтан тек белгілі әрі белді компаниялардың сілтемесіне жүгіну керек.
