Қазақстанда +27 градусқа дейін жылы болады
Фото:depositphotos.com"Қазгидромет" мамандары 8, 9 және 10 қазанға арналған ауа райы болжамын ұсынды, деп хабарлайды Tengrinews.kz .
Болжамға сәйкес, алдағы күндері Қазақстанда құбылмалы ауа райы сақталады. Өңірлердің басым бөлігінде жаңбыр, ал еліміздің солтүстік-батысында, солтүстігінде және шығысында жаңбыр мен жылбысқы қар жаууы күтіледі. Сонымен қатар батыс пен оңтүстікте жауын-шашын болжанбайды, онда температура +27 градусқа дейін көтеріледі.
Жаңбыр мен қар қай жерде күтіледі?
Атмосфералық фронталды бөліктердің әсерінен Қазақстанның басым бөлігінде жаңбыр жауады. Еліміздің солтүстік-батысында, солтүстігінде және шығысында жауын-шашын жаңбыр мен жылбысқы қар түрінде болады.
Шығыста көктайғақ құбылыстары күтіледі. Республика бойынша жел күшейеді деп болжанады, ал түнгі және таңғы уақытта кей жерлерде тұман түседі.
Батыста күн +27 градусқа дейін жылынады
Елдің батысында түнде +5...+16 градус жылы болады. Күндіз температура +17...+22 градустан +22...+27 градусқа дейін көтеріледі.
Оңтүстік пен оңтүстік-шығыста түнде +3...+10 градус болады, таулы аймақтарда 2 градусқа дейін үсік жүруі мүмкін. Күндіз ауа температурасы +17...+25 градусқа, таулы аймақтарда +12...+17 градусқа дейін көтеріледі.
Қай өңірлерде күн суытады?
Қазақстанның солтүстік-батысында, солтүстігінде және орталығында түнде температура +3...+13 градустан -1...-6 градусқа дейін төмендейді. Күндіз негізгі температуралық фон +10...+17 градус шамасында болады.
Шығыста түнде 0...+8 градус күтіледі. Күндіз температура +10...+15 градустан +2...+7 градусқа дейін төмендейді.
Қазақстанда қазан айы қандай болады?
Бұған дейін синоптиктер Қазақстандағы 2026 жылдың қазан айына арналған ауа райы болжамын нақтылаған болатын. Күздің екінші айы күрт суытумен, жаңбырмен және қармен басталады, алайда кейін елге жылымық оралады. Оңтүстікте кей кезеңдерде температура +30 градусқа дейін көтерілуі мүмкін. Толығырақ осы жерден оқыңыз.
