Қазақстанда ыстыққа байланысты қашықтан жұмыс істеуге немесе кестені өзгертуге бола ма?
Фото:depositphotos.comЕңбек министрлігі аптап ыстыққа байланысты қазақстандықтардың қашықтан жұмыс істеуге немесе икемді кестеге ауыстырылу мүмкіндігін түсіндірді, деп хабарлайды Tengrinews.kz.
Жұмыс берушілер аптап ыстыққа байланысты қызметкерлерді қашықтан жұмыс істеу форматына автоматты түрде ауыстыруға міндетті емес.
Қашықтан немесе аралас жұмыс режимі қызметкердің немесе жұмыс берушінің бастамасымен, бірақ тараптардың келісімі бойынша белгіленуі мүмкін.
Яғни, қызметкер уақытша қашықтан жұмыс істеуді сұрай алады, алайда түпкілікті шешім жұмыс берушімен бірлесіп қабылданады.
Қашықтан жұмыс істеу кезінде қызметкер жұмыс уақытында байланыста болуы тиіс.
Жұмыс кестесін өзгертуге бола ма?
Жұмыс беруші мен қызметкер икемді жұмыс кестесі туралы да келісе алады. Мысалы, күннің ең ыстық уақытында жұмыс істемеу үшін жұмыс күнін ертерек бастауға болады.
Мұндай режимнің шарттары еңбек шартында немесе жұмыс берушінің ішкі актісінде бекітіледі.
Далада жұмыс істейтіндерге не қарастырылған?
Аптап ыстықта далада еңбек ететін жұмысшыларға салқындау және демалу үшін арнайы үзіліс берілуі тиіс.
Бұл үзіліс жұмыс уақытына кіреді. Сондай-ақ жұмыс беруші қызметкерлердің демалып, салқындауына арналған орынды жабдықтауы қажет.
Егер жұмыс жағдайлары өмірге немесе денсаулыққа қауіп төндірсе, қызметкер жұмысты орындаудан бас тартуға құқылы. Бұл туралы дереу басшыға немесе жұмыс берушінің өкіліне хабарлау қажет.
Ереже бұзылған жағдайда қызметкер еңбек инспекциясына жүгіне алады. Инспектор заңбұзушылықтарды жоюды талап етуге және жұмыс берушіні әкімшілік жауапкершілікке тартуға құқылы.
