Полиция ескертуі: Жүргізушілерге "ақылы жолға қарызсың" деген жалған SMS-хабарламалар келуде
Сурет:Zakon.kz
Абай облысы полиция департаменті алаяқтардың жүргізушілерге "ақылы жолдар бойынша қарыздары бар" деген жалған SMS-хабарламалар жіберіп жатқанын ескертеді, деп хабарлайды Zakon.kz.
Ведомство мәліметінше, хабарламалар ресми ұйымдардан емес, белгісіз нөмірлерден келеді:
"Ішінде күдікті сілтеме беріледі және ол арқылы "төлем жасау" немесе жеке деректерді енгізу талап етіледі. Бұл сілтемелердің "KazToll" немесе басқа ресми жол қызметтеріне ешқандай қатысы жоқ. Алаяқтар ресми сайттарға ұқсатып жасалған жалған сайттар арқылы банк картасының мәліметтерін, SMS-кодтарды және басқа да жеке ақпаратты алуға тырысады".
Ал ресми ұйымдар ешқашан белгісіз нөмірден SMS жіберіп, күдікті сілтеме арқылы бірден төлем жасауды талап етпейді. Мұндай хабарлама алған жағдайда:
- белгісіз нөмірден келген SMS-ке сенбеңіз
- сілтемені ашпаңыз
- ешқандай жеке дерек енгізбеңіз
- хабарламаны өшіріп, нөмірді бұғаттаңыз.
"Қорытынды: белгісіз нөмір + күдікті сілтеме + "қарыз бар" деген хабарлама = 100% алаяқтық", деп хабарлайды Абай облыстық ПД баспасөз қызметі.
