Полиция ескертеді: ресми айыппұл туралы хабарламалар тек 1414 нөмірінен келеді

Полиция интернет-алаяқтардың нысанына автокөлік иелері іліге бастағандығы туралы ескертті.

Фото: iStock

Полиция қызметкерлері интернет-алаяқтардың нысанына автокөлік иелері іліге бастағандығы туралы ескертті, - деп хабарлайды Aikyn.kz Polisia.kz сайтына сілтеме жасап.

Соңғы уақытта түрлі елдерде жол қозғалысы ережесін бұзғаны үшін жалған айыппұлдар жіберуге байланысты интернет-алаяқтықтың жаңа түрі тіркеліп отыр.

Қаскөйлер автокөлік иелеріне электрондық пошта немесе мессенджерлер арқылы хаттар мен хабарламалар жібереді. Онда жүргізушінің жеке деректері, көлік нөмірі және "айыппұлды төлеуге арналған" сілтеме көрсетіледі. Алайда бұл – фишингтік шабуыл. Егер адам банк картасының деректерін енгізсе, алаяқтар оның есепшотына қол жеткізеді. Кей жағдайларда сілтемелер арқылы жеке деректерді ұрлайтын вирустар да таралады. Мұндай шабуылдар АҚШ пен Ресейде тіркелген, ал енді олардың Қазақстанда таралу қаупі бар, – деді Алматы қаласы ПД киберқылмысқа қарсы күрес басқармасының бастығы Әнес Қалдыбаев.

Полиция еске салады: ресми айыппұл туралы хабарламалар тек 1414 қысқа нөмірінен келеді және ешқашан төлем жасауға арналған сілтемелерді қамтымайды.

Айыппұлдарды egov.kz, qamqor.gov.kz сайттарында немесе банктердің мобильді қосымшалары арқылы тексеруге болады.

Егер Сізге күмәнді хабарлама келсе: • сілтемелерге өтпеңіз және тіркелген файлдарды ашпаңыз; • ақпаратты тек ресми дереккөздерден тексеріңіз; • егер карта деректерін енгізіп қойған болсаңыз – дереу картаңызды бұғаттап, банкке және полицияға "102" нөмірі арқылы хабарласыңыз. Сақ болыңыздар және жақындарыңызды да ескертіңіздер!, - делінген хабарламада.