Экранның ар жағындағы өмір

Бүгінде әлеуметтік желі күнделікті тіршіліктің ажырамас бөлігіне айналды. Таңертең көзімізді ашқаннан бастап, кешке ұйқыға кеткенше телефон экранына үңілетініміз жасырын емес. Бір қарағанда бұл қалыпты көрінгенімен, уақыт өте келе оның адамның көңіл күйіне, қарым-қатынасына және өмір сүру дағдысына әсері байқала бастайды.

Соңғы жылдары адамдар өз өмірін өзгелердің жарияланымдарымен салыстыруға бейім болып кетті. Әдемі суреттер, үздіксіз жетістіктер мен мінсіз өмір көріністері шынайы өмірдің толық бейнесі емес екенін бәріміз түсінсек те, санамыз оны қабылдай бермейді. Соның салдарынан өз мүмкіндігін бағаламау, көңілсіздік пен күйзеліс пайда болуы мүмкін.

Тағы бір мәселе – ақпараттың шамадан тыс көптігі. Әрбір хабарлама, әрбір дыбыс адамның назарын бөліп, ойын басқа арнаға бұрады. Нәтижесінде кітап оқуға, білім алуға немесе отбасы мүшелерімен еркін әңгімелесуге бөлінетін уақыт азаяды.

Мамандар бос уақыттың бір бөлігін табиғат аясында серуендеуге, спортпен шұғылдануға немесе шығармашылықпен айналысуға жұмсаудың тиімді екенін айтады. Мұндай қарапайым әрекеттер адамның ойы мен сезімін реттеп, өмірге деген қызығушылығын арттырады.

Әлеуметтік желіден толықтай бас тарту міндет емес. Ең маңыздысы – оны саналы пайдалану. Пайдалы ақпаратқа басымдық беріп, уақытты тиімді жоспарлай алған адам технологияның емес, технология өзіне қызмет ететін деңгейге жетеді.

Шынайы күлкі, жақындармен жүздесу, табиғаттың тынысы мен өмірдің қарапайым сәттері ешбір экран алмастыра алмайды. Сондықтан виртуалды кеңістікте жоғалып кетпей, өз өміріміздің басты кейіпкері болып қалу – бүгінгі қоғам үшін ең өзекті міндеттердің бірі.

Серікбай Айгерим,

Қорқыт ата атындағы Қызылорда университетінің бірінші курс студенті.