Абысын-ажындар байқауы өтті

Шараны қалалық ардагерлер кеңесінің мүшесі, «Семей-Невада» қоғамдық бірлестігінің төрағасы Өмірбек Күлімбетов ашып, қатысушыларға сәттілік тіледі. Байқауға қалалық әйелдер кеңесінің төрайымы мен «Ғибрат» әжелер мектебінің мүшелері – Дана Сабырова, Күләш Бисенова және Жаңабике Ибайдуллаева қазылықетті. Сайыс үш кезең бойынша өтіп, әр қатысушының өнерін жан-жақты көрсетуге мүмкіндік берді.

Алғашқы кезеңде қатысушылар өздерін таныстырып, жеке ерекшеліктері мен бойындағы дарындарын ортаға салды. Екінші кезеңде абысыны мен келіні жұп болып өнер көрсетіп, шығармашылық қабілеттерін байқатты. Ал ақырғы кезеңде қатысушылар ұмыт болып бара жатқан ұлттық тағамдарды дайындап, қазылар алқасына ұсынды. Бұл кезең ұлттық салт-дәстүр мен аспаздық өнерді үйлестіріп, көрерменге ерекше әсер қалдырды.

Байқау қорытындысы бойынша бірнеше номинацияларда жеңімпаздар анықталды. «Дана абысын, Жаңашыл келін» номинациясын Қазалы аграрлы-техникалық колледжінен қатысқан абысын Ғазиза Таңжарықова мен келіні Арайлым Өмірзақ иеленді. «Өнегелі абысын, Инабатты келін» номинациясы №1 «Ақерке» бөбекжай-балабақшасының абысыны Айжамал Нұрсейітова мен келіні Фариза Тулегеноваға бұйырды. «Мейірімді абысын, Өнерлі келін» номинациясын Қ. Нұрмаханов атындағы №95 мектептің абысын Наталия Баркова мен келіні Айдана Аралбаева жеңіп алды. Ал «Жаңашыл абысын, Шебер келін» номинациясын М. Горький атындағы №16 мектеп-лицейдің абысын Гүлбарам Жауғашарова мен келіні Әлия Тілеуқабылова қанжығалады.

Бұл байқау «Адал адам» мәдени-тәрбие орталығының «Жанұя шуағы» жобасы аясында, Наурызнаманың онкүндігінде ұйымдастырылып, қазақ халқының дәстүрлі мәдениеті мен отбасы құндылықтарын дәріптеудің жарқын көрінісіне айналды.