Аудан әкімі Ақсуат ауылының тұрғындарымен кездесті
Бүгін аудан әкімі Алмасбек Есмаханов Ақсуат ауылына барып, тұрғындармен кездесу өткізді.Ауыл халқымен өткен кездесуде аудан әкімі алдымен өткен жылдың қорытындысы бойынша Президентіміздің, облыс әкімінің қолдауымен ауданда атқарылған жұмыстарды жан-жақты баяндады. Сонымен қатар биылғы жылға жоспарланған жобалар мен алдағы міндеттерге тоқталды. Кездесу барысында Мемлекет басшысының Сыр өңірінде өткен Ұлттық құрылтайдың V отырысына қатысып, ел дамуы үшін маңызды шешімдер қабылданғанын атап өтті. Соның ішінде Конституциялық өзгерістер бойынша жалпыхалықтық референдумның маңызына ерекше тоқталды. Алдағы 15 наурызда өтетін референдум – еліміздің болашағын айқындайтын тарихи қадам екенін жеткізіп, Жаңа Конституция жобасын қолдауға, ел бірлігін көрсетуге шақырды.
Аудан басшысы тұрғындарға «Ауыл аманаты» бағдарламасы аясында мемлекет тарапынан көрсетілетін қолдаулар жайында да айтып өтті. Атап айтқанда, ауыл кәсіпкерлеріне жеңілдетілген несие беру, жаңа жұмыс орындарын ашу, кооперация құру, шағын және орта бизнесті дамыту мүмкіндіктері туралы ақпарат берді. Кездесу соңында тұрғындар елді мекенге қатысты өз ұсыныс-пікірлерінде жеткізді.
Ауыл халқымен өткен кездесуден кейін аудан әкімі ауылдық округтегі №100 мектепте орналасқан №85 референдум учаскесінің дайындығын көріп, материалдық-техникалық жағдайымен танысты.
