Жаңа Ата заңдағы азаматтық жауапкершілік пен еңбек құқықтары қаралды
Қазалыда аумақтық коалицияның мүшелері ақпараттық-түсіндіру жұмыстарын жалғастырып, әлеуметтік сала өкілдерімен кезекті мазмұнды кездесу өткізді. Жиында жаңа Конституция жобасына енгізілген өзгерістер мен толықтырулардың стратегиялық мәні, олардың саяси жүйені жаңғыртудағы және құқықтық мемлекетті нығайтудағы рөлі кеңінен талқыланды. Коалиция жетекшісі Ғазиз Әліш жаңа Конституция жобасындағы әр азаматтың заңды сақтау, өзге адамдардың құқықтары мен бостандықтарын құрметтеу міндетінің қоғамдағы өзара сенім мен жауапкершілік мәдениетін қалыптастыратынын атап өтті.
«Конституциялық модель адамның өмірі мен қадір-қасиетін мемлекеттің ең жоғары құндылығы деп тануға негізделген. Барлық билік институттары азаматтардың құқықтары мен бостандықтарын қорғауды басты басымдық ретінде қарастырады. Конституция жеке және цифрлық деректерді қорғауды қоса алғанда, жеке өмір кепілдіктерін күшейтеді, сондай-ақ кінәсіздік презумпциясы мен әділ сот талқылауы сияқты іс жүргізу принциптерін бекітеді», – деді коалиция жетекшісі.
Коалиция мүшесі Әбдуали Рахметов жаңа Конституция еңбек құқықтарын маңызды деп танып, қызметкерлердің әлеуметтік қорғалуын мемлекеттің міндеті ретінде бекітетінін атап өтті. Конституция әр адамның еңбек етуге, кәсіби қызметін еркін таңдауға құқығын қамтамасыз етеді және мәжбүрлеудің кез келген нысандарына жол бермейді. Сонымен қатар, ол еңбек қауіпсіздігі мен гигиенасын, тең еңбекақыны және кемсітусіз сыйақы алуды кепілдейді.
Жиын қорытындысы бойынша әлеуметтік сала өкілдері сұрақтар қойып, ұсыныстарын айтты.
Пікір 3