Конституцияның 30 жылдығы – ел тұрақтылығы мен тәуелсіздіктің берік негізі
Қазақстан Республикасының Конституциясы – мемлекеттің негізгі заңы, елдегі құқықтық жүйенің іргетасы. 1995 жылы 30 тамызда бүкілхалықтық референдум арқылы қабылданған Конституцияға биыл 30 жыл толып отыр. Бұл – Қазақстанның тәуелсіз мемлекет ретінде қалыптасуы мен дамуы жолындағы маңызды тарихи белес.Конституцияда мемлекеттің басқару нысаны, азаматтардың құқықтары мен бостандықтары, билік тармақтарының өкілеттігі нақты айқындалған. Ата Заңда «адам, оның өмірі, құқықтары мен бостандықтары – мемлекеттің ең қымбат қазынасы» деп көрсетілуі еліміздің демократиялық және құқықтық бағытты ұстанатынын дәлелдейді.
Осы 30 жыл ішінде Конституция Қазақстан қоғамындағы тұрақтылық пен бірліктің кепіліне айналды. Экономикалық, саяси және әлеуметтік реформалардың барлығы Ата Заңға сүйене отырып жүзеге асырылды. Конституция елдегі бейбітшілік пен келісімді сақтауға, түрлі ұлт пен ұлыс өкілдерінің тең құқығын қамтамасыз етуге қызмет етті.
Конституция – тек заңдар жиынтығы емес, ол әрбір азаматтың өмірлік бағдары. Әр адам өз құқықтары мен міндеттерін білу арқылы қоғамда жауапкершілікпен өмір сүреді. Сондықтан жастарға Конституцияны құрметтеу, заңды сақтау және отансүйгіштік қасиеттерді қалыптастыру – маңызды міндет.
Қорытындылай келе, Конституцияның 30 жылдығы – еліміздің тәуелсіздік жылдарындағы жетістіктерін саралап, болашаққа нық қадам басуға мүмкіндік беретін айтулы мереке. Ата Заң – Қазақстанның тұрақты дамуы мен жарқын болашағының сенімді кепілі.
Фото: ашық дереккөзден алындыСерік БЕРТАЙ,
Қазалы аудандық соты судьясы
