Желтоқсан көшесі жөнделуде
Ауданның әлеуметтік-инфрақұрылымдық дамуы жолдардың жағдайына тікелей байланысты екені белгілі. Соңғы жылдары Әйтеке би кентінде осы бағыттағы жұмыстар жүйелі түрде жүргізіліп, елді мекеннің келбеті айтарлықтай жаңарып келеді. Сол жұмыстардың бірі –тұрғындар көптен күткен Желтоқсан көшесін жөндеу жобасы.Қазіргі таңда бұл көшеде асфальт төсеу қарқынды жүріп жатыр. Жуырда аудан әкімі Алмасбек Есмаханов жөндеу барысымен арнайы танысып, мердігер мекеме өкілдерімен және жергілікті тұрғындармен пікірлесті.
Желтоқсан көшесі кент ішінде көлік қозғалысы ең жиі өтетін жолдардың бірі болғандықтан, оның сапалы жөнделуі – тұрғындар үшін көптен күткен өзгеріс. Бұған дейін талай рет көтерілген мәселе бүгінде шешім тауып, халық ризашылығын білдіруде. Аудан басшысы «Строймодуль Астана» ЖШС мамандарына жұмысты белгіленген мерзімде әрі сапалы орындауды тапсырды.
Айта кетейік, биыл Әйтеке би кентіндегі 15 көшеге орташа және күрделі жөндеу жүргізу жоспарланған болатын. Бүгінгі күні оның 13-іне асфальт толықтай төселіп біткен. Ал Желтоқсан және Төремұрат жырау көшелеріндегі жұмыстар желтоқсан айында толық аяқталмақ.
Бекзат АСАН
