Жанарымда жарық әлем
Елімізде 13 қараша – көру қабілеті шектеулі жандарға құрмет көрсетудің, олардың қоғамдағы орнын дәріптеудің маңызды күні ретінде аталып өтеді. Атаулы күн қарсаңында Әйтеке би кенті әкімдігінің ғимаратында «Жанарымда жарық әлем» атты шара өтті.Басқосуға Қазалы ауданы әкімінің орынбасары Дәурен Оңғарбайұлы, аудандық жұмыспен қамту және әлеуметтік бағдарламалар бөлімінің басшысы Совет Кеңесұлы арнайы қатысып, ізгі тілектерін жеткізді. Кездесу барысында өмірдің әртүрлі белестерінен өткен жандарға құрмет көрсетіліп, аудан әкімінің Алғыс хаттары табыс етілді.
Мерекелік көңіл-күйді Әйтеке би кенттік мәдениет үйінің өнерпаздары арттырды. Әсем әндер, жүректі тербейтін шығармалар қатысушыларға шаттық сыйлады, шараға ерекше жылылық пен мейірім қосылды.
Осындай шаралар қоғамдағы өзара қолдауды нығайтып, ұрпақ сабақтастығына үлес қосады. Жанарында үміттің оты, жүрегінде мейірімнің нұры бар жандар үшін бұл – рухани демеу, ал кейінгі буынға үлгі боларлық іс. Әрбір қатысушы өз өмірінің жарығын осы жылы кездесулерде көріп, шабыт алары анық.
"ҚАЗАЛЫ" ақпарат
