Қандай жағдайда қазақстандықтардың мобильді байланыстары бұғатталады

Қандай жағдайда қазақстандықтардың мобильді байланыстары бұғатталады
Фото: Ru.freepik.com

Мобильді оператор екі күн ішінде алаяқтар қоңырау шалған жасалған нөмірді тексріп, ондағы байланысты бұғаттайды. Бұл туралы Stan.kz ақпарат агенттігі хабарлайды.

Жасанды интеллект және сандық даму министрлігі алаяқтарға қарсы күресу үшін байланыс қызметін көрсету ережелеріне түзетулер енгізді.

Атап айтқанда, операторлар өздерінің антифрод жүйелері негізінде алаяқтық белгісі бар қоңыраулар мен SMS-терді анықтап, олар туралы барлық ақпаратты, соның ішінде абоненттің аты-жөні, ЖСН және тіркелген абоненттік нөмірлерін Ұлттық банктің антифрод орталығына хабарлауы керек.

Сонымен қатар, егер абоненттер операторға алаяқтардан қоңыраулар келгенін хабарласа немесе осындай ақпаратты Ұлттық банктің антифрод орталығы берсе, оператор екі күн ішінде осы нөмірді тексеруі қажет.

Алаяқтық фактісі расталса, оператор сол нөмірдегі абонентке қызмет көрсетуін тоқтатып, бұл туралы Ұлттық банкке хабарлауы керек.

Сондай-ақ операторлардың 10-нан астам нөмірді рәсімдеуге қатысты ережелер нақтыланды. Ол үшін абонент қосымша нөмірлердің қажет екенін негіздейтін өтініш беріп, нөмірлерді қолдану мақсатын көрсетуі тиіс.

Министрліктің бұйрығы 18 қарашадан бастап күшіне енеді.