Елді мекенді таза ауызсумен қамту жұмыстарын көрді
«AMANAT» партиясының сайлауалды бағдарламасы аясында Қазалы ауданында елді мекендерді таза ауызсумен қамтамасыз ету бағытында бірқатар жобалар жүзеге асуда. Солардың бірі Сарыбұлақ елді мекенінің тұрғындарын ауыз сумен қамту жобасы.Аудан орталығынан 120 шақырым қашықтықта орналасқан ауылда жүзеге асып жатқан жобаның басты мақсаты – тұрғындарды
сапалы әрі таза ауызсумен қамтамасыз ету. Осы мақсатта мердігер «CК Дәнекер» ЖШС тарапынан су тұщытқыш қондырғысы орнатылып, сыйымдылығы 100 текше метр болатын екі су сақтау резервуары мен насостық тарату станциясы арқылы автономды су желісі тартылуда. Сондай-ақ ауыл ішіне су құбыры жүргізіліп, екі скважина бұрғыланып, темірбетон құдықтар мен қоршаулар орнатылды.
Құрылыс жұмыстарымен аудандық партия филиалының атқарушы хатшысы, партиялық бақылау комиссиясының мүшесі Нұрғиса Жалғасбаев және аудандық мәслихат депутаты, партиялық бақылау комиссиясының мүшесі Райымбек Бөлебаев танысты. Олар мердігер өкілдері мен сала мамандарымен пікірлесіп, жобаны сапалы әрі мерзімінде аяқтау бойынша бірқатар ұсыныстар айтты.
