Ата Заң – азат елдің арқауы
Фото: vk.comТарих толқынында небір дәуір өтті. Бірақ әр ұлттың, әр мемлекеттің тағдырын өзгертетін сәттер болады. 1995 жылдың 30 тамызы – дәл сондай күн. Сол күні қазақ халқы өз болашағын бекемдеген, ертеңіне сеніммен қарауға жол ашқан қадам жасады. Бұл – Қазақстан Республикасының Конституциясы қабылданған күн.
Биыл еліміздің Ата Заңына – 30 жыл. Осы үш онжылдықта Қазақстан өз мемлекеттігін нығайтып, әлемге танылған, іргелі елге айналды. Ал осы жетістіктің негізінде – Конституция тұр.
Конституция – жай ғана заңдар жинағы емес, ол – ел рухының, халықтың ерік-жігерінің көрінісі. Осы құжатта елдің қандай бағытта дамитыны, қандай құндылықтарды басшылыққа алатыны айқын жазылған. "Қазақстан – демократиялық, зайырлы, құқықтық және әлеуметтік мемлекет" деген бір сөйлемнің астарында қаншама жауапкершілік, үміт пен ұмтылыс жатыр.
Өткен 30 жыл – жаңғыру мен жаңару жолы. Конституциямыз тұрақтылықты сақтап, халық пен билік арасындағы алтын көпірге айналды. Мемлекеттік билік тармақталып, тепе-теңдік принципі қалыптасты. Адам құқықтары мен бостандықтары – басты құндылық ретінде орнықты.
Уақыт өз талабын қояды. Жаңа дәуір – жаңа шешімдерді қажет етеді. 2022 жылғы реформалар арқылы Конституцияға енгізілген өзгерістер халық пен билік арасындағы байланысты одан әрі күшейтті. Бұл – халық дауысы мен үні заң алдында нақты көрініс тапқан сәт болды.
30 жыл – тарих үшін қысқа мерзім шығар, бірақ елдің тағдыры үшін – тұтас бір дәуір. Конституция – осы дәуірдің айғағы, ертеңге бастар сенімді жол. Ата Заңды ардақтау – елдікті ұлықтау. Өйткені Конституция – біздің тәуелсіздігіміздің темірқазығы, еркіндігіміздің ерен ескерткіші.
Д.Н.АБДЫКАЛЫКОВ,
Қазалы аудандық сотының төрағасы
