Абай Құнанбайұлының 180 жылдығы – рухани жаңғырудың маңызды белесі
Фото: gov.kz2025 жылы қазақ халқының ұлы ақыны, ағартушы, ойшыл және философ Абай Құнанбайұлының туғанына 180 жыл толып отыр. Бұл айтулы дата – еліміздің рухани дамуы мен мәдени мұрасын ұлықтау тұрғысынан аса маңызды.
Абай Құнанбайұлының шығармашылығы – қазақ халқының әдеби, мәдени, философиялық ой-санасының жаңа кезеңге көтерілуінің бастамасы болды. Ол өзінің өлеңдері, қара сөздері және аудармалары арқылы халықты білімге, ғылымға, еңбекқорлыққа, әділдік пен адамгершілікке үндеді. Оның еңбектерінде ұлттың болмысы, қоғамның кемшіліктері мен болашағы туралы терең ойлар көрініс тапқан.
Абайдың қара сөздері – қазақ халқының рухани тәрбиесінде ерекше орын алады. Ол өз еңбектерінде адам мен қоғам, мораль, білім, сенім мәселелерін терең талдады. Абайдың «толық адам» тұжырымдамасы қазіргі Қазақстан қоғамының адам тәрбиесі мен рухани дамуы үшін өзектілігін жоғалтқан жоқ.
Абай Құнанбайұлының 180 жылдық мерейтойы аясында елімізде және шетелде бірқатар іс-шаралар ұйымдастырылуда. Олардың қатарында ғылыми-практикалық конференциялар, көрмелер, шығармашылық байқаулар, кітаптар мен аудармалар шығару секілді мәдени-танымдық жобалар бар. Бұл шаралар ұлы ойшылдың мұрасын кеңінен насихаттауға және жас ұрпақтың санасында рухани құндылықтарды қалыптастыруға бағытталған.
Абай Құнанбайұлының 180 жылдық мерейтойы – Қазақстанның мәдени, рухани және тарихи өміріндегі маңызды оқиға. Абайдың өсиеттері мен идеялары бүгінгі күні де өз маңызын жоғалтқан жоқ. Сондықтан ұлы ақынның мұрасын зерделеу, сақтау және насихаттау – әрбір азаматтың борышы.
Ж.Бостандықұлы,
Қазалы аудандық сотының судьясы
