Қазақстанда жаңадан құрылатын кассациялық соттар: құқықтық реформаның жаңа кезеңі
Фото: gipermed.ruҚазақстан Республикасында жүргізіліп жатқан сот жүйесін жаңғырту аясында өткен жылдан бастап, жаңа кассациялық соттар құру туралы шешім қабылданды. Бұл қадам елдің құқықтық жүйесін жетілдіру, азаматтардың сотқа қолжетімділігін арттыру және әділ сот төрелігін қамтамасыз ету мақсатында қолға алынған маңызды реформа болып саналады.
Кассациялық сот – сот жүйесінің жоғары сатысындағы орган болып табылады. Ол төменгі соттардың шешімдерінің заңдылығын және негізділігін тексеруге бағытталған. Яғни, апелляциялық сатыдан кейін келіп түскен шағымдарды қарастырып, сот актілеріне соңғы құқықтық баға береді.
Сот реформасы – Қазақстанның құқықтық мемлекет ретінде дамуының басым бағыты. Қолданыстағы жүйеде кейбір істердің ұзаққа созылуы мен біркелкі тәжірибе қалыптаспау мәселелері туындағаны белгілі. Жаңадан құрылатын кассациялық соттар:
Сот істерін қараудың сапасын арттыруға, азаматтардың құқықтарын қорғау тетіктерін жетілдіруге, бірыңғай сот практикасын қамтамасыз етуге, заң нормаларын біркелкі түсіндіруге мүмкіндік береді.
Жаңа кассациялық соттар дербес құрылым ретінде жұмыс істейді және белгілі бір санаттағы азаматтық, әкімшілік және қылмыстық істерді қарайтын болады. Бұл соттарға жоғарғы білікті судьялар тартылады. Сонымен қатар, сот процесінің ашықтығы мен әділдігі басты назарда болады.
Кассациялық соттардың құрылуы – Қазақстан сот жүйесінің жаңғыру жолындағы нақты әрі сапалы қадамы. Бұл реформа сот билігіне деген сенімді арттырып қана қоймай, елдегі құқық үстемдігін нығайтуға бағытталған.
С.М.БЕРТАЙ,
Қазалы аудандық сотының судьясы
