Жол жаңарып, тротуар төселуде
Ерте көктемнің ызғары әлі де сезіледі. Жұмысшылар осындай күн райын пайдаланып қалайық дегендей, жұмысқа қызу кіріскен. Кенттегі Жаңқожа батыр атындағы көше құрылыс алаңына айналған. Айналада құмырсқа-тірлік. Бос жүрген жұмысшы жоқ.
Аудан келбеті күн санап әсемденіп келе жатқанына куә болып жүрміз. Түрлі нысандар бой көтеріп, ерекше жерлер тұрғындардың игілігіне салынып жатыр. Жол жаңарып, тротуарлар түзелуде. Соның бірі – Жанқожа батыр көшесінің бойына жаяу жүргіншілер жолы салынуда. Ол оқушылардың білім ордасына, тұрғындардың көше бойында орналасқан аудандық прокуратура, сот, аудандық аурухана мен емханаға және басқа да жұмыс орындары, қажетті орталықтарға қатынауына қолайлы жағдай қалыптастырады. Сондай-ақ ең бастысы жаяу жүргіншілер жолының салынуы тұрғындардың жол қауіпсіздігін сақтауына үлкен септігін тигізбек. Жаяу жүргіншілер жолы Әйтеке би кенті әкімі аппаратының тапсырысы бойынша аудандық бюджеттен бөлінген қаржыға салынуда. Жалпы тротуар ұзындығы – Төремұрат жырау көшесінен бастап аудандық емханаға дейінгі аралықты қамтиды. Мұндағы қайнаған тіршілік таң атқаннан күн батқанға дейін қызу жүргізілуде. Жұмысшылар өздеріне бекітілген жұмысты бітірмейінше бір тынбайды. Қай-қайсысы болса да өз міндетіне жауапты.
Алыстан қарағанда құрылысы көз тартатын жүргінші жол көше келбетіне көрік қосуда. Әрине, жұмыстың нәтижесіне қарап оң баға беру әлі ерте. Десе де тұрғындар бұл бастаманың жүзеге асып жатқанына дән риза. Иә, қазақта «жақсы жол елге жора» деген тәмсіл бар. Ел игілі үшін жасалған әрбір дүниені ұқыпты үйлестірсек, аудан келбетінің көркеюіне қосқан игі ісіміз болмақ. Салынған жолдан мың адам өтіп алғысын айтса, сауабы мол қайырымды іс.
Еске салайық, өткен жылы аудан орталығы – Әйтеке би кентіндегі Жанқожа батыр көшесіне кеңейту жұмыстары жүргізіліп, 4 жолақты жол пайдалануға берілген болатын. Сонымен қатар аталмыш жолдың бойындағы №249 мектеп-лицей мен аудан әкімдігі ғимаратының алды абаттандырылып «Руханият» сквері салынды. Мұнымен қоса былтыр жолдың екінші бетіне жасыл белдеу салынып, ағаш көшеттері отырғызылса, биыл аудан әкімінің тапсырмасына сәйкес Төремұрат жырау көшесінен бастап аудандық емханаға дейінгі аралығына жаяу жүргіншілер жолын салу жұмыстары басталды. Атқарылып жатқан бұл жұмыстар тиісті мерзімде аяқталып, аудан тұрғындары игілігін көретін күн алыс емес.
Айнұр ӘЛИ
