ӘЛСЕЙІТ КӨПІРІ МЕН БЕКАРЫСТАН БИ АУЫЛЫ АРАСЫНДАҒЫ ЖОЛДЫ ЖӨНДЕУ ЖҰМЫСТАРЫ БАСТАЛДЫ
Биыл жыл соңына дейін Қазалы ауданы бойынша жақсы және қанағаттандырарлық жағдайдағы жолдардың үлесін 92 пайызға жеткізу жоспарланып отыр. Осыған сәйкес бүгінде аудан аумағындағы жоспарланған жол жөндеу жұмыстарының бірқатары басталып кетті. Соның бірі – Әлсейіт көпірі мен Бекарыстан би елді мекенінің аралығындағы 6,5 шақырымды құрайтын жолға күрделі жөндеу жұмыстары.Бүгін аудан әкімі Мейрамбек Шермағанбет елді мекенге арнайы барып, аудандық маңыздағы жол құрылысы жұмыстарын көрді. Сондай-ақ мердігер мекеме «Қазалы Жолшы» жауапкершілігі шектеулі серіктестігінің жауапты өкілімен кездесіп, жолдың бекітілген стандартқа сай сапалы болуын қадағалауды қатаң ескертті. Сонымен қатар, жол құрылысы өз мерзімінде аяқталу керектігін айтып, тиісті сала басшысына жол сапасын күнделікті бақылауды тапсырды.
Аудан әкімі бұдан кейін, «Қожабақы-Бекарыстан би 25 км» аудандық маңыздағы автомобиль жолының бойында орналасқан темірбетон көпірді көрді. 1978 жылы салынған «Еңбекарық» деп аталып кеткен темірбетонды көпірдің бүгінде бағаналары жарылып, сынған. Бұл көпір арқылы Сырдария өзенінің сол жағалауында орналасқан елді мекен тұрғындары аудан орталығына қатынап, Бекарыстан би, Түктібаев, Майдакөл ауылдарының тұрғындары ауылшаруашылық өнімдері мен мал азығын тасымалдайды.
Осыған орай, аудан әкімі аудандық тұрғын-үй коммуналдық шаруашылығы және автомобиль жолдары бөлімі басшысының міндетін атқарушы Жасұлан Сыдықовқа темірбетон көпіріне қайта жаңғырту жұмыстарын жүргізу үшін жоба-сметалық құжаттарын тезірек әзірлеуді тапсырды.
#Қазалы
