Қазалы ауданы – ежелден ән мен жырдың өлкесі саналады. Қаншама күміс көмей, жезтаңдай әншілер мен күйшілер де ауданның атын әлемге асқақтатып, қазақтың дәстүрлі өнерін дәріптеп келеді. Сондай жастардың бірі – Еркебұлан Абай. Ол Әйтеке би кентінде 2005 жылы дүниеге келген. Е.Бозғұлов атындағы №249 мектеп-лицейден түлеп ұшқан соң Қазанғап атындағы Жоғарғы музыкалық колледжінде білімін шыңдайды. Бүгінді таңда ол «Адиля» өнер орталығында қызмет атқарады.

– Бойымдағы өнер ата-анамнан дарыған десем, қате айтпағаным. Әкем домбырада ойнайды. Ал анам ән айтады. Оқымаған, белгілі бір жерде қызмет етпеген. Тек бойындағы өнерімен біздің, яки балаларының құлағының құрышын қандырып өсірді. Өнерде 15 түрлі аспапта ойнаймын. 3-4 сыныптан бастап гитара, домбырада үйреніп, ойнай бастадым. Былтыр Қызылорда обылысында «Үздік ұстаз» төсбелгісімен марапатталдым. Қазір шәкірттерім де бар. Қай жарысқа барса да бас жүлдені қанжығасына байлап жүр. Дубай, Австралия, Ташкент, Түркия, Стамбул секілді шет елдерге жолдама алды. Алға қойған жоспарларым көп. Соның бірі Қазалыдағы өнер білімін дамытып, шәкірттерімізді жоғарғы белестерге көтергім келеді, – дейді өнерлі жас.

Қазақ халқы өнер деген қастерлі дүниені өте жоғары бағалаған. «Жігітке жеті өнер де аз», «Өнерлі өрге жүзеді», «Өнерді үйрен, үйрен де жирен» деген бабалар даналығы, ел аузындағы мақал-мәтелдер соның айғағы іспеттес. Иә, өнер – ұлт таңдамайды, жас талғамайды. Өйткені ол жеті жұртқа да ортақ.