"Президент Қасым-Жомарт  Тоқаевтың соңғы сұхбаты еліміздің бүгінгі жағдайын, болашаққа арналған стратегиялық бағыттарын және өткеннің сабақтарын ашық әрі шынайы талдаған маңызды құжат болды. Бұл сұхбатта тек жетістіктер ғана емес, шешуді талап ететін мәселелер деәділ айтылды.

Қазақстанның халықаралық аренада қол жеткізген жетістіктері көзге көрініп тұр. Көптеген мемлекет ондаған жылдар бойы жүзеге асыра алмаған нәтижелерге біз қысқа мерзім ішінде қол жеткіздік. Президенттің сыртқы саяси аренадағы әр қадамы еліміздің мүддесін қорғауға және әлемдік қауымдастықтағы беделін нығайтуға бағытталған. Бұл – үлкен еңбектің жемісі.

2022 жылғы Қаңтар оқиғасы Қазақстан тарихындағы ауыр сынақ болды. Бірақ бұл оқиға біздің ел ретінде қаншалықты мықты екенімізді көрсетті. Қазір еліміз сол қиын кезеңнің салдарын еңсеріп, тұрақтылық пен даму жолында нық қадам басып келеді. Президент реформалардың маңыздылығын және олардың бірте-бірте жүзеге асатынын ашық айтты.

Өкінішке қарай, өткен кезеңдердегі кейбір жартылай орындалған реформалардың салдары әлі де сезілуде. Тарихтың тәжірибесі көрсеткендей, мұндай қателіктердің әсері жылдар бойы байқалады. Кеңес Одағы ыдырағаннан кейінгі қиын жылдарда біз ұзақ уақыт бойы өз орнымызды іздедік. Бүгінде бізге уақыт керек, бірақ дұрыс бағытта келе жатқанымыз анық.

Президенттің экономикалық блокқа қатысты айтқандары өте орынды. Сыртқы саясатта жетістіктер айқын, бірақ ішкі экономикада әлі де көптеген түйінді мәселе шешімін таппаған. Біз Парламент қабырғасында бұл туралы жиі айтамыз.

Кейде экономикалық шешімдер қағаз жүзінде жақсы көрінгенімен, тәжірибе мен практикалық білім жетіспейтіндіктен, шынайы өмірде тиісті нәтижесін бермейді. Осындай жағдайларда кейбір шенеуніктер, әсіресе вице-министр деңгейінде және төменгі буын басшылары, өз қателіктерін мойындаудың орнына, қисынсыз шешімдерді қорғап, тіпті жоғарыдан келген бұйрықтарды соқыр түрде орындап жатады. Мемлекеттік органдарда кейде функционалдық жауапкершілік пен логиканың жетіспеушілігі анық байқалады.

Парламентте біз кейде ұзаққа созылған пікірталастарға куә боламыз. Кейбір әріптестер дұрыс шешім табуға тырысады, қателіктерді мойындайды және оларды түзетуге әрекет жасайды. Алайда  өкінішке қарай, кейбіреулер өз біліксіздігін жасыру үшін кез келген бағада өз ұстанымдарын қорғап қалуға тырысады. Бұл – мемлекет дамуына кедергі келтіретін факторлардың бірі.

Президенттің «жерді көрген, халықпен тығыз байланыста жұмыс істеген, нақты тәжірибесі бар мамандарды тарту қажет» деген сөзі өте орынды. Экономика  – бұл тек статистика мен есептер емес, нақты адамдардың өмірі, олардың қажеттіліктері мен мәселелерін шешу.

Сұхбат барысында Мемлекет басшысы бұрынғы кезеңдерге де әділ әрі ашық баға берді. Кейбір ащы шындықтар айтылды, бірақ бұл өткенді жоққа шығару емес, керісінше, одан сабақ алу қадамы. Тарихты қабылдау, қателіктерді мойындау – болашаққа сенімді қадам жасаудың белгісі.

Президент Тоқаевтың сұхбаты бізге айқын бағдар берді. Біз алдымызда тұрған мәселелерді жасырмай, оларды шешудің нақты жолдарын іздеуіміз керек. Әрбір қиындық, бұл – жаңа мүмкіндік.

Ең бастысы,  бізде саяси ерік-жігер, халықтың қолдауы және алға қойған нақты мақсаттар бар. Ел болып ұйыссақ, қоғамның әр мүшесі өз үлесін қоса білсе, Қазақстан үлкен жетістіктерге жететініне сенемін.

Біз дұрыс жолдамыз. Алға жылжуымыз қажет. Әрқайсымыз өз орнымызда жауапкершілікпен, адалдықпен және кәсібилікпен жұмыс істеуіміз керек".