Басты бағыты кент аумағын жасыл желекпен көмкеру болып саналатын «Қазалы абаттындыру» мекемесі жыл басында, қаңтар айының 16-сы құрылған. Содан бері аталған мекеме Қазалының тазалық шараларымен қатар көркейту-көгалдандыру жұмыс­тарына айрықша назар аударылған.

Олжас Ахметов басшылық ететін «Қазалы абаттандыру» мекемесі жыл көлемінде каналдар мен арық жүйелерін тазалап, аллеялар мен орталық көшелердегі гүлзарларды, көгалды күтіп-ұстап, қураған ағаштарды кесу, баптау жұмысын жандандырып келеді.

– Аудан әкімі Мейрамбек Зинабдин­ұлының тапсырмасымен биыл жыл басында «Қазалы абат­тандыру» мекемесі ашылды. Мекеменің құрылғанына аз болса да ауыз толтырып айтарлықтай жұмыс атқарды деп айтуға болады. Жалпы коммуналдық мемлекеттік мекеменің міндетіне, қызметіне ком­муналдық меншіктегі кенттің маңызы бар автомобиль жолдары мен ішкі көшелерін күтіп ұстау, кент көлеміндегі жол жүрісі қауіпсіздігін қамтамасыз ету мақсатында бағдаршамдар, жол белгілері мен жол үсті таңбаларын күту де кіреді.

Бұдан бөлек, коммуналдық мен­шік­тегі автотұрақтарды, оның ішін­де айып автотұрақтар күтімі, коммуналдық меншіктегі суағарлар, гүлзарлар, субұрқақтар, көше жарықтандыру құралдарын және жаяу жүргіншілер жолдарының жұмысы. Коммуналдық меншіктегі саябақтарды күтіп ұстау мен кент теңгеріміндегі балалар ойын алаңдарын, кент теңгеріміндегі мүліктердің санитарлық-тазалығын қамтамасыз ету мен көше бойындағы бейнебақылау жүйелерін күту секілді тағы да басқа жұмыстар міндеттелген, – дейді мекеме директоры.

Бүгінде абаттандыру мекемесінде жиырма екі азамат қызмет етуде. Алдағы уақытта штат ауқымы кеңеймек. Алдағы жылда аталған орынға электрик, дәнекерлеуші се­кілді басқа да қосымша жұмыстарға 60-70 шақты жұмыс қолы тартылмақ. Қазіргі таңда мекеме қызметкерлері орталық көшелердегі жаяу жүргінші жолына кедергі келтірген талдарды түзеу мен тазалығымен қатар айналысуда.

– Табиғатпен тіл табысып, кент аумағын гүлдендіріп, жайқалту – біз­дің міндет. «Атадан мал қалғанша, тал қалсын» дейді халық даналығында. Бабалар өсиетін бағдар еткен аудан әкімінің бастамасымен ауданда ағаш түптерін отырғызу, жалпы сенбілік жұмысы қарқынды жүріп, бір жүйеге келді. Нәтижесінде қасиетті Қазалыны жаз бойы жасыл желекке малынып, жайқалып көз сүйсініп, көңіл қуанады. Туған жерді түрлендіріп, қоғамдық орынды таза ұстау – баршамызға ортақ парыз. Әсіресе, біздің мекеме үшін де маңызы зор, – дейді Олжас Ахметов.

Биыл кентті көркейту-көгал­дандыруға жергілікті бюджеттен 48 миллион 279000 теңге бөлініп, орталық аймаққа гүлдер мен газондар отырғызылды. Арық жүйелері тазартылып, жасыл екпелер егіліп, суарылды. Бұдан бөлек, ескірген жаяужүргіншілер жолдары ретке келтіріп, сырлану жұмыстары да жүргізілген.

Аз ғана уақыт ішінде біршама, жүйелі де жемісті жұмыстар атқарған «Қазалы абаттандыру» мекемесіне бәрекелді деуден артығы жоқ. Кенттің көркін келтірген орынның ғұмырлы болуын тілей отырып, алдағы жұмыстарға сәттілік тіледік.