Ұлттық тәрбие – ұлт құндылығы
Жақында “Шұғыла” бөбекжай-балабақшасында “Біртұтас тәрбие” бағдарламасы аясында “Ұлттық тәрбие – ұлт құндылығы” атты апталық ұйымдастырылды. Жоспарланған ауқымды шара аясында түрлі мазмұнды тақырыптар қамтылды. Апталықтың соңғы күні “Ұлттық құндылығымыз – өшпес музыка” атты шара өтті.Сан ғасырлық тарихы бар, атадан балаға мұра болып, бүгінге жоғалмай жеткен жәдігер – домбыра ұлттың ұлы мұрасы. Төл қазынаның құнын қастерлеп, жас ұрпаққа жеткізу мақсатын көздеген мазмұнды тәрбие жұмысында балабақшаның музыка жетекшісі Гүлмира Омаралықызы бүлдіршіндерге қазақтың киелі домбырасы туралы кең көлемде түсінік берді. Қонаққа шақырылған шебер ұста Ерболат Қанатбай домбыраның қыр-сырын ұқтырып, жасалу жолдарымен бөлісті. Домбыра қазақ халқының өмірінде маңызды орын алатын, өзіндік музыкалық ерекшелігі бар аспап екенін атап өтті. Балалар сұрақ қойып, білімдердін толықтырды.
Шара соңы апталықтың жабылуымен жалғасты. Балабақша меңгерушісі Айгүл Ерішева апталықтың өте жоғары деңгейде өткенімен бөлісіп, әріптестеріне ризашылығын жеткізді. Сондай-ақ дәстүрлі өнерді дәріптейтін жұмыстар жыл бойы тұрақты жүргізілетінін жеткізді. Бұл күні бүлдіршіндер әсем әннен шашу шашып, өнер көрсетті.
Нұргүл МЫҢБАЕВА
