Салмағы 500 грамнан басталады: Қазақстанда жыл сайын 22 мыңға жуық нәресте шала туады
Фото: ҚР Денсаулық сақтау министрлігіҚазақстанда халықаралық стандарттарға сәйкес келетін 12 жаңа перинаталдық орталық салу жоспарланып отыр, деп хабарлайды Halyq Uni.
Денсаулық сақтау министрлігінің мәліметінше, елімізде жыл сайын 20-22 мың бала мерзімінен бұрын туады, бұл барлық туған сәбилердің шамамен 5%-ын құрайды. Жүктілігі 36 аптадан аз және дене салмағы 2500 грамнан кем туған бұл балалар ерекше назар мен күтім жасауды қажет етеді.
Шала туған нәрестелерде анатомиялық тұрғыдан дұрыс, бірақ функционалды жетілмеген ағзалары бар, бұл оларды өте әлсіз етеді. Мұндай балалардың терісі өте жұқа және осал, тері астындағы май деңгейі төмен, функционалды жетілмеген өкпе, жетілмеген жүрек-қан тамырлары және ас қорыту жүйелері, сондай-ақ өте сезімтал орталық нерв жүйесі бар, делінген ақпаратта.
Елімізде заманауи перинаталдық технологиялар дене салмағы 500 грамнан басталатын және салмағы 1000 грамнан төмен жаңа туған нәрестелерге сәтті күтім жасауға мүмкіндік береді. Бүгінде заманауи жабдықтармен жабдықталған жоғары мамандандырылған кешенді көмек көрсету үшін 39 перинаталдық орталық жұмыс істейді. Сондай-ақ министрлік халықаралық стандарттарға сәйкес келетін 12 жаңа перинаталдық орталық салуды жоспарлап отыр.
Айта кетейік, шала туған нәрестелерге күтім жасау процесі неонатологтарды, анестезиолог-реаниматологтарды, мейіргерлерді және басқа да бейінді мамандарды қоса алғанда, медицина қызметкерлерінің барынша назары мен біліктілігін талап етеді. Мәселен, бір шала туған нәрестеге күнделікті күтім жасау 20-дан астам әртүрлі манипуляцияны қамтиды.
Қазақстанда ДДҰ ұсынған тиімді перинаталдық технологиялар мен ана болу қауіпсіздігі қағидаттары енгізілді. Жаңа туған нәрестелерге реанимация және қарқынды терапия дамып келеді, неонатологтар жыл сайын ел ішінде де, шетелде де оқытылады. 2023 жылы әрбір жаңа туған нәрестенің өмірін сақтауға бағытталған неонаталдық көмек көрсетуді ұйымдастыру стандарты бекітілді.
Министрлік мәліметінше, соңғы 15 жылдың ішінде (2008 жылдан 2023 жылға дейін) нәресте өлімінің көрсеткіші 3 есе, неонаталдық өлім 3,3 есе төмендеді, ал дене салмағы өте төмен балалардың өмір сүру деңгейі 4 есе өсті. Бұл нәтижелер Орталық Азия елдерінің арасында үздік болып табылады.
Еске салсақ, бүгін 17 қарашада әлемде шала туған нәрестелер күні аталып өтіледі. Бұл күнді белгілеуге 2009 жылы Еуропалық жаңа туған нәрестелерге күтім жасау қоры (EFCNI) бастамашы болған. Мамандар осылайша қоғамның назарын репродуктивтік денсаулықты нығайту қажеттілігіне аудару, медицина қызметкерлері мен шала туған балалары бар отбасылардың алдында тұрған мәселелерді шешуге көмектесуді көздейді.
