Бүгін аудандық ардагерлер үйінде елімізде Атом электр станциясын салуды қолдау жөніндегі Қазалы аудандық Халықтық штабының бірқатар мүшелері марапатталды.Бұл саяси науқанның үгіт кезеңінде кент, қала және барлық ауылдық округтердің ардагерлер кеңесінің төрағалары Халықтық штаб мүшесі ретінде үгіт жұмыстарын жүргізуге қатысып, белсенділік танытты. Осы ретте аудандық партия филиалының төрағасы Ғазиз Әліш нәтижелі жұмыстың аясында дауыс берушілердің басым бөлігі АЭС салу бастамасына қолдау білдіргенін атап өтті.

«Еліміз бойынша дауыс берушілердің 71,12%-ы АЭС салуды қолдап, дауыс берді. Ал өңір халқының 82,48 пайызы референдумға қатысып, республика бойынша көш бастады. Осы тұста Сыр жұртшылығының ел болашағы үшін қабылданатын шараларға бей-жай қарамайтындығының көрінісін байқауға болады.
Бұдан бөлек аудан халқы дауыс беру күні жоғары белсенділікпен өз таңдауларын жасады. Бұл саяси науқан кезінде Қазалы аудандық Халықтық штабының әрбір мүшесінің тұрғындарға нақты түсіндіріп, күшейтілген тәртіппен жасаған жұмыстарының бірден-бір нәтижесі», - деді филиал төрағасы.

Мұнан соң бірқатар ардагерлерге Халықтық штаб төрағасы, Мәжіліс төрағасы Ерлан Қошановтың және партияның облыстық филиалының төрағасы Алмасбек Есмахановтың Алғыс хаттары табысталды.

Өз кезегінде ардагерлер алдағы уақытта да мемлекеттің жарқын болашағы үшін жұмыла жұмыс істеуде қалыс қалмайтындарын айтып, ризашылықтарын білдірді.