Әйтеке бидің ғибратты ғұмырынан сыр шертетін бейнекөрсетіліммен бастау алған мүшәйраны аудан әкімінің орынбасары Болат Әбенұлы құттықтау сөзімен ашып, талапкерлерге сәттілік тіледі.

Дүбірлі додадаға Қызылорда қаласынан және Шиелі, Қармақшы, Жалағаш, Сырдария, Арал, Қазалы аудандарынан от ауызды, орақ тілді нағыз жүйрік 10-ға жуық жас ақындар қатысып, бақ сынады.

Байқаудың талаптары бойынша ақындар бірінші кезеңде аузымен құс тістеген, аяқтыға жол, ауыздыға сөз бермеген данышпан шешен, Әйтеке биге арнау, екінші кезеңде еркін тақырыптағы өлең-жырларын оқыды.

Қазылар алқасы тақырыптың ашылуы мен мазмұнына, өлең мағынасының тереңдігіне, шумақ ұйқасына, сахна мәдениетін игеру деңгейіне, өлеңнің жатқа оқылуына басты назар аударырп, шешім шығарды.

Тартысты жыр бәйгесінің жеңімпаздарын ақын, Қазақстан Жазушылар одағының мүшесі, Ж.Әбдірашев атындағы әдеби сыйлықтың лауреаты, Қызылорда облысының құрметті ардагері, Арал ауданының құрметті азаматы, қазылар алқасының төрағасы Толыбай Абылаев, ҚР мәдениет саласының үздігі, тарихшы Болат Әбенұлы Жолтаев, №266 мектеп-лицей мұғалімі Өтеулиева Сағыныш Мұхитқызы сараптады.

Байқау қорытындысымен жүлделі ІІІ орындар Қызылорда қаласынан Тәңірбергенов Ұлықбекке, Шиелі ауданы Ержігіт Бекжанға бұйырса, ІІ орын Жалағаш ауданы Жасұлан Серіктің еншісіне тиді. Арал ауданынан Сайлауов Айдар І орын, Қазалы ауданынан Түменбай Ақжол бас жүлдені еншілеп, мүшәйра жеңімпазы атанды. Ал, Әйтеке би атындағы арнайы сыйлыққа Қызылорда қаласынан келген Кәдірбай Ғабит лайықты деп танылды. Жүлдегерлерге арнайы марапатпен қоса, қаржылай сыйлықтар табысталды.

Елдің бірлігі мен тағдырын ойлаған, мемлекет іргесін нығайтуды жүзеге асыру үшін еңбектенген, сол үшін күрескен тарихи тұлға - Әйтеке би бабамыздың 380 жылдық торқалы тойы баршаңызға құтты болсын!

#Қазалы

#ӘйтекеБи380жыл

#АқындарМүшайрасы